 |  عراق میں تشدد کے واقعات میں کمی نہیں آئی |
عراق کے دارالحکومت بغداد کے ہوائی اڈے کی طرف جانے والی ایک اہم شاہراہ پر مسلح مزاحمت کاروں نے گھات لگا کر ایک گاڑی پر حملہ کیا اور اس میں سوار تین افراد کو ہلاک کر دیا۔ امریکی فوج کے مطابق تینوں افراد سکیورٹی کنٹریکٹرز تھے۔ ایک اور واقعہ میں بغداد میں ہونے والے ایک بم دھماکے میں ایک امریکی فوجی ہلاک اور تین دوسرے زخمی ہو گئے ہیں۔ بم کو سڑک کے ساتھ نصب کیا گیا تھا جو امریکی پٹرول کے وہاں آتے ہی پھٹ گیا۔ دریں اثناء بندوق برداروں نے اس شخص کے بھائی کو ہلاک کر دیا ہے جس نے صدام حسین کے دونوں بیٹوں اودے اور قصے کی موصل میں موجودگی کی مخبری کی تھی۔ دونوں کو گزشتہ سال جولائی میں ایک فوجی آپریشن میں ہلاک کر دیا گیا تھا۔ شمالی شہر موصل سے حکام نے اطلاع دی ہے کہ نواف زیدان کے بھائی صالح زیدان ایک کار میں جا رہے تھے کے ایک دوسری کار میں آنے والے افراد نے ان پر فائرنگ شروع کر دی۔ فائرنگ سے وہ موقع پر ہی ہلاک جبکہ کار میں سوار ان کے تین ساتھی زخمی ہو گئے۔ ضالح زیدان کو اس سے قبل بھی موت کی دھمکیاں ملتی رہی ہیں۔ یاد رہے کہ نواف زیدان نے موصل کے ایک گھر میں صدام حسین کے بیٹوں اودے اور قصے کی کوجودگی کے بارے میں مخبری کر کے تیس ملین ڈالر کا انعام حاصل کیا تھا۔ دوسری طرف نجف سے آنے والی اطلاعات کے مطابق شہر میں زندگی معمول پر واپس آنا شروع ہو گئی ہے اور کسی قسم کے لڑائی کے واقعات کی کوئی خبر نہیں آئی۔ عراقی پولیس ڈیوٹی پر واپس آ گئی ہے اور سکولوں میں کلاسیں لگنا شروع ہو گئی ہیں۔ | 
یہ صفحہ دوست کو ای میل کیجیئے
پرِنٹ کریں
