رمزفیلڈ نے امریکی ٹھیکیداروں کے قاتلوں کی حوالگی کا مطالبہ کیا ہے

واشنگٹن ان لوگوں کی حوالگی کا مطالبہ کر رہا ہے جنہوں نے اس ماہ کے اوائل میں چار امریکی ٹھکیداروں کو قتل کیا تھا۔ڈونلڈ رمزفیلڈ نے انہیں ٹھگ ، قاتل اور صدام حسین کے کٹر حامی قرار دیتے ہوئے کہا کہ انہیں امن اور آزادی کو تباہ کرنے کی اجازت نہیں دی جائے گی۔

ایک سینئر امریکی جنرل پیٹر پیس نے کہا کہ اگر ضرورت پڑی تو امریکی مرینز کارروائی کےلئے تیار ہیں ۔ قبل ازیں امریکی فوج نے بتایا کہ جنگ بندی کے باوجود اس کے فوجی دستوں نے فلوجہ میں آٹھ عراقیوں کو ہلاک کیا ہے ۔

امریکی ترجمان نے بتایا کہ یہ لوگ راکٹ سے داغے جانے والے بم لیے ہوئے تھے ۔ فلوجہ کی لڑائی میں اب تک 600 سے زائد عراقی اور تقریباً 70 امریکی ہلاک ہو چکے ہیں۔

قبل ازیں کل عراق میں امریکی فوج کے ایک اعلٰی اہلکار جنرل مارک کمٹ نے کہا تھا کہ اگر فلوجہ میں عراقی عسکریت پسندوں نے ہتھیار نہ ڈالے تو امریکی فوج اپنا آپریشن دوبارہ شروع کردے گی۔
یہ بیان جنرل کمٹ نے عراق کے مقامی رہنماؤں کے ساتھ ایک معاہدہ طے کرنے کے بعد جاری کیا تھا ۔ اس معاہدے میں کہا گیا ہے کہ عسکریت پسندوں کو بھاری اسلحہ امریکی فوج کے حوالے کرنا ہوگا۔

جنرل کمٹ نے کہا امریکہ کو یہ علم تو نہیں ہے کہ ان افراد کے پاس کتنی تعداد میں بھاری اسلحہ موجود ہے تاہم انہیں یہ ہتھیار امریکی فوجیوں کے حوالے کرنے ہوں گے۔

انہوں نے اس اقدام کے لئے وقت کی کسی حد کا تعین تو نہیں کیا تاہم ان کا کہنا تھا کہ وہ فلوجہ میں ایسی صورتحال بحال کرنا چاہتے ہیں جس میں اتحادی افواج آزادانہ طور پر شہر کا گشت کرسکیں اور عراقی پولیس اپنا کام دوبارہ شروع کرسکے۔