عبدالعزیز رنتیسی کار پر حملے میں ہلاک

انہیں نشانہ بنا کر ہلاک کیا گیا۔ یہ حملہ اس وقت ہوا جب وہ غزہ شہر سے اپنی کار میں گزر رہے تھے۔

رنتیسی کی موت حماس کے روحانی پیشوا شیخ احمد یاسین کی موت کے ٹھیک 26 دن کے بعد ہوئی۔ انہیں بھی اسی طرح کے اسرائیلی ٹارگٹ حملے میں ہلاک کیا گیا تھا۔

اس موقع پر عبدالعزیز رنتیسی کا کہنا تھا کہ اسرائیل نے دوزخ کے دروازے کھول دیئے ہیں۔

عینی شاہدین کا کہنا ہے کہ اس حملے میں رنتیسی کی کار میں موجود دو دیگر افراد بھی ہلاک ہو گئے ہیں۔

اس سے قبل غزہ شہر کے شمال میں ایک سرحدی چوکی پر ایک فلسطینی خودکش بمبار نے حملہ کیا جس میں بمبار سمیت ایک اسرائیلی فوجی ہلاک ہو گیا۔

رنتیسی کو زخمی حالت میں ہسپتال لے جایا گیا

غزہ شہر میں بی بی سی کے نامہ نگار پیٹر گریسٹ کے مطابق لوگوں کا خیال ہے کہ اسرائیلی حملہ اسی خودکش حملے کا جواب ہے۔

مقامی وقت کے مطابق رات کے ساڑھے آٹھ بجے ہونے والے دھماکے کی آواز پورے غزہ شہر میں سنی گئی۔ اس طرح کی اطلاعات بھی ہیں کہ کار پر دو میزائل پھینکے گئے۔

دوسرے مرنے والوں میں رنتیسی کے ایک بیٹے بھی بتائے جاتے ہیں۔

جس وقت انہیں تباہ شدہ کار سے نکالا گیا تو رنتیسی ابھی زندہ تھے۔ انہیں فوراً ہسپتال پہنچایا گیا لیکن ڈاکٹروں کی کوششوں کے باوجود وہ دم توڑ گئے۔

ان کی جان بچانے کی کوشش کرنے والے ڈاکٹر جمعہ الساکا نے بی بی سی کو بتایا کہ رنتیسی کو شدید زخمی حالت میں ہسپتال لایا گیا تھا۔ ان کے سر پر شدید چوٹیں آئی تھیں اور ان کی گردن اور جسم کے دوسرے حصوں پر گہرے زخم تھے۔

انہوں نے کہا کہ دنیا کا’ کوئی ہسپتال بھی انہیں نہیں بچا سکتا تھا‘۔

حماس کے حامی فوراً ہی ہسپتال اور دھماکے کی جگہ پہنچ گئے اور اپنے غم و غصے کا اظہار کیا۔

حماس کے ایک رہنما اسماعیل ہانیہ نے ہسپتال میں رپورٹروں کو بتایا کہ ’اسرائیل اس حملے پر افسوس کرے گا۔ بدلہ آ رہا ہے۔ یہ خون رائیگاں نہیں جائے گا۔ یہ حماس میں ہماری قسمت ہے اوور یہ بطور فلسطینی ہماری قسمت ہے کہ ہاری موت شہید کے طور پر ہو‘۔

عبدالعزیز رنتیسی کی کار

حماس کے شدت پسند قائد رنتیسی شیخ یاسین کی موت کے بعد اسرائیل کے سب سے اہم ٹارگٹ بتائے جاتے تھے۔

اسرائیی فوج نے حملے کی تصدیق کی ہے اور کہا ہے کہ ’رنتیسی دہشت گردی کے سرغنا تھے اور وہ کئی دہشت گرد حملوں کے ذمہ دار تھے جن میں بہت سے اسرائیلی ہلاک ہوئے‘۔

یاد رہے کہ یہ واقعہ صدر بُش کی اس توسیخ کے بعد ہو ا ہے جس میں انہوں نے اسرائیلی وزیر اعظم ایریئل شیرون سے کہا تھا کہ وہ غرب اردن کے کچھ علاقے اسرائیلی قبضے میں ہی رہنے دیں اور فلسطینی مہاجرین کو اس علاقے میں داخل ہونے سے روکیں جو اب اسرائیلی سرحد میں شمار کیا جاتا ہے۔