اعجاز مہر بی بی سی اردو ڈاٹ کام‘اسلام آباد

پاکستان میں شیخ احمد یاسین کے قتل کے خلاف احتجاج جاری ہے

یہ قرارداد سوموار کو وفاقی وزیر داخلہ فیصل صالح حیات نے قومی اسمبلی میں پیش کی۔

قرار داد میں کہا گیا ہے کہ ارکان اسمبلی مشرق وسطی کے مقبوضہ علاقوں میں اسرائیل کے ختم نہ ہونے والے تشدد کی مذمت کرتے ہیں اورشیخ احمد یاسین اوران کے ساتھیوں کو نشانہ بنا کر قتل کرنے پر افسوس کا اظہار کرتے ہیں۔

قرار دادا میں کہا گیا ہے کہ پاکستان اس قتل کا ذمہ دار اسرائیلی حکومت کو قرار دیتا ہے۔

قرار داد میں عالمی برادری پر زور دیا گیا ہے کہ معصوم فلسطینیوں پر بڑھتے ہوئے تشدد کو روکنے کی کوششیں تیز کی جائیں اور فلسطینی عوام کو روزمرہ کی جدوجہد میں درپیش بنیادی معاملات پر بھی توجہ دی جائے۔

قراداد میں کہا گیا ہے کہ پاکستان مشرق وسطی میں امن کیلئے منصفانہ کوششوں کی حمایت کرتا ہے اور ان کوششوں کی بھی جو آزادانہ اور خودمختار فلسطینی ریاست کے قیام کیلئے ہو رہی ہیں۔

اس سے پہلے جب اجلاس شروع ہوا تو لیاقت بلوچ کی تجویز پرشیخ احمد یاسین کے لئے فاتحہ خوانی کی گئی۔

جب انہوں نے متفقہ قرارداد پیش کرنے کا کہا تو سپیکر نے انکو روک دیا اور کہا کہ ابھی کوئی وزیر نہیں جب کوئی آجائےتو بات کریں۔ اس پر حزب اختلاف نے احتجاج کرتے ہوئے ایوان سے واک آؤٹ کیا اور کچھ ہی دیر بعد حزب اختلاف نے کورم کی نشاندہی کردی سپیکر نے گنتی کرائی تو کورم پورا نہ تھا اور اجلاس تھوڑی دیر کیلئےملتوی کردیا۔

اس دوران حکومت نے حزب اختلاف کے رہنماؤں سے بات کی اور مشترکہ طور پر متفقہ قرار داد کا متن تیار کرنے پر اتفاق کیا جو بعد میں ایوان سے منظور کرائی گئی۔