صرف پچھلے سال مختلف واقعات میں چھتیس صحافی ہلاک ہوئے۔

پوری دنیا میں سن دو ہزار دو میں انیس صحافی ہلاک ہوئے تھے لیکن گزشتہ برس یہ تعداد چھتیس تک پہنچ گئی جس کا بڑا سبب عراق کے خلاف امریکی فوجی کاروائی کے دوران تیرہ صحافیوں کی ہلاکت رہا۔سی پی جے نے اپنی رپورٹ میں پاکستان میں بھی صحافیوں کی حالت زار کا تذکرہ کیا ہے اور اس حوالے سے بعض پاکستانی قوانین کے صحافیوں کے خلاف استعمال کی جانب اشارہ کیا ہے۔ رپورٹ میں یہ بھی بتایا گیا ہے کہ گزشتہ برس پاکستانی ذرائع ابلاغ کو سیاست میں فوج کے کردار اور فوج کے اندرونی واقعات کے حوالے سے بھی بہت زیادہ دباؤ کا سامنا رہا۔ اس حوالے سے رپورٹ میں کئی اہم واقعات کا بھی ذکر ہے جن میں صدر جنرل مشرف کی جانب سے ایک پاکستانی ماہنامے ہیرلڈ پر بقول جنرل مشرف قومی مفادات کے منافی سرگرمیوں کا الزام بھی شامل ہے۔رپورٹ کے مطابق پاکستان میں پارلیمان نے ازالۂ حیثیت عرفی سمیت ذرائع ابلاغ سے متعلق ان بہت سے قوانین کی منظوری دینے سے انکار کردیا جن کو جنرل مشرف آئین میں شامل کرانا چاہتے تھے۔تاہم سی پی جے نے اس جانب بھی اشارہ کیا ہے کہ گزشتہ برس ہی پاکستان میں ذرائع ابلاغ کی آزادی کی جانب ایک بڑا قدم بائیس ایف ایم ریڈیو لائسنسوں کے اجراء کے ذریعے اٹھایا گیا جبکہ نجی اداروں کو ٹیلی ویژن لائسنسوں کے لیے درخواست دینے کی بھی اجزت دی گئی۔