انڈیا میں سیاحتی مقامات پر ’سیلفی ڈینجر زون‘
،تصویر کا ذریعہAP
انڈیا میں مرکزی حکومت نے مختلف ریاستی حکومتوں کو ہدایت کی ہے کہ وہ ایسے سیاحتی مقامات جہاں حادثات کا خطرہ ہو وہاں خطرے سے آگاہ کرنے کے لیے بورڈ نصب کریں جس ’سیلفی ڈینجر زون‘ درج ہو۔
حکومت نے یہ فیصلہ سیاحتی مقامات پر سیلفی لینے کے دوران حادثات کے باعث شرحِ اموات بڑھنے کے بعد کیا ہے۔
مرکزی حکومت نے اس سلسلے میں مختلف ریاستوں کے محکمۂ سیاحت کے سکریٹریز کو خط لکھا ہے جس میں ہدایت کی گئی ہے کہ ایسے تمام علاقے جہاں خطرہ ہو سکتا ہے کہ وہاں باقاعدہ نشاندہی کی جائے۔
وزارت سیاحت کی ایڈیشنل سکریٹری جنرل میناکشی شرما نے کہا کہ خطرے کے حامل علاقوں میں سیاحتی پولیس اور رضا کار تعینات کرنے کے ساتھ ساتھ خطرے سے آگاہ کرنے کے لیے بورڈ بھی لگائے جائیں۔
میناکشی شرما نے حکام کو ہدایات دی ہیں کہ ایسے مقامات جہاں ’ممکنہ خطرہ‘ ہے وہاں باڑ لگائیں اور ذرائع ابلاغ اور سوشل میڈیا پر آگاہی مہم چلائی جائیں۔
،تصویر کا ذریعہAP
حالیہ کچھ عرصے کے دوران انڈیا میں سیاحتی مقامات پر سیلفی لیتے ہوئے کسی حادثے کا شکار ہونے کے درجنوں واقعات ہوئے ہیں۔
وزارتِ سیاحت کے حکام کا کہنا ہے کہ انھوں نے انڈیا کے یوم آزادی کے موقع پر سکیورٹی کے انتظامات کو موثر بنانے کے لیے یہ ہدایات جاری کی ہیں۔
گذشتہ سال سیلفی لینے کی کوشش میں دنیا میں ہونے والی 27 ہلاکتوں میں سے 15 انڈیا میں ہوئیں۔
End of سب سے زیادہ پڑھی جانے والی
انڈیا میں ہلاک ہونے والے افراد میں جاپان کا وہ سیاح بھی شامل ہے جو تاج محل پر سیلفی لیتے ہوئے سڑھیوں سے گر کر ہلاک ہو گیا تھا۔
