کشمیر پر مودی کا ہنگامی اجلاس، پاکستان کی تشویش
،تصویر کا ذریعہAFP
انڈیا کے زیرِ انتظام کشمیر میں جمعے سے شروع ہونے والی احتجاجی لہر کے دوران ہلاک ہونے والوں کی تعداد 31 تک پہنچ گئی ہے جبکہ وزیراعظم نریندر مودی نے وادی میں پرتشدد واقعات پر تشویش ظاہر کی ہے۔
کشمیر سے ہمارے نامہ نگار ریاض مسرور نے بتایا ہے کہ پوری وادی میں منگل کو بھی کرفیو نافذ رہا اور مزید تین زخمیوں کی ہلاکت کے بعد جمعے سے اب تک ہلاک ہونے والوں کی تعداد 31 ہوگئی ہے جن میں سے ایک کے سوا تمام عام شہری ہیں۔
وزیر اعظم نریندر مودی نے افریقی ممالک کے دورے سے واپسی پر منگل کو دارالحکومت دہلی میں کشمیر کی صورتحال پر ایک خصوصی اجلاس کی صدارت کی ہے جس میں وزیر داخلہ راج ناتھ سنگھ اور وزیر خزانہ ارون جیٹلی سمیت متعدد وزرا اور اعلی اہلکار شامل ہوئے۔
،تصویر کا ذریعہEPA
اجلاس کے بعد صحافیوں سے بات کرتے ہوئے ریاستی وزیر ڈاکٹر جتیندر سنگھ نے کہا کہ وزیراعظم کشمیر کے حالات پر نظر رکھے ہوئے ہیں اور ریاست کی ہر ممکن مدد کی جائے گی۔
ان کا کہنا تھا، ’وزیر اعظم نے کشمیر کے حالات کا جائزہ لیا اور وہاں کی صورتحال پر تشویش ظاہر کی ہے۔‘
اطلاعات کے مطابق انڈیا کی مرکزی حکومت اس پورے معاملے میں جموں و کشمیر کی ریاستی حکومت کے ردعمل سے خوش نہیں ہے اور اس بارے میں وزیر داخلہ جلد ہی ریاستی حکومت سے بات کریں گے۔
End of سب سے زیادہ پڑھی جانے والی
منگل کو پاکستان کے دفتر خارجہ نے انڈین ہائی کمشنر گوتم بمباوالے کو طلب کیا اور پاکستان کی جانب سے کشمیر میں حالیہ کشیدگی اور ہلاکتوں پر ’شدید خدشات‘ کا اظہار کیا۔
اس سے قبل پیر کی شام امریکی محکمۂ خارجہ کے ترجمان جان کربی نے پیر کو واشنگٹن میں صحافیوں کو بریفنگ دیتے ہوئے کشمیر کی صورت حال پر تشویش کا اظہار کیا اور مسئلے کے پرامن حل پر زور دیا۔
،تصویر کا ذریعہPMOINDIA
جان کربی کا کہنا تھا کہ امریکہ کو انڈیا کے زیرِ انتظام کشمیر میں مظاہرین اور انڈین فوج کے درمیان بڑھتے ہوئے تشدد پر تشویش ہے اور وہ اس معاملے کے پر امن حل کے لیے فریقین سے مدد کی درخواست کرتا ہے۔
آٹھ جولائی سے جاری کشیدگی کو ختم کرنے کے لیے انڈیا کی حکومت نے پہلے ہی سیاسی حریفوں اور کشمیر میں سرگرم تمام سیاسی حلقوں سے تعاون کی درخواست کی ہے۔
ایک سوال کے جواب میں جان کربی کا کہنا تھا کہ یہ معاملہ انڈیا کا ہے اور اس معاملے پر انڈیا بہتر انداز میں بات کر سکتا ہے۔
واضح رہے کہ انڈیا کے زیرِ انتظام کشمیر میں گذشتہ جمعہ کو وادی بھر میں مقبول نوجوان مسلح کمانڈر برہان وانی کی ایک مبینہ تصادم میں ہلاکت کے بعد احتجاجی مظاہروں کی لہر پھیل گئی تھی۔
