’سچن کو نہیں جانتے؟‘ بھارتی برہم

معروف کرکٹر سچن تنڈولکر کے بھارتی شائقین برطانوی ایئر لائن برٹش ایئر ویز کو ایک ٹویٹ کی بنا پر شدید تنقید کا نشانہ بنا رہے ہیں۔

تنڈولکر نے ایئر لائن کو ٹویٹ کر کہ شکایت کی تھی کہ انھیں اچھی سروس نہیں دی گئی تھی اور کہا تھا کہ عملے کو صارفین کی ’کوئی پروا نہیں ہے۔‘

سچن تندولکر ورلڈ کپ 2015 کے سفیر مقرر

سچن اپنی زندگی پر بننے والی فلم میں کام کریں گے

ایئر لائن نے تنڈولکر کی ٹویٹ کے رد عمل میں انھیں تکلیف پہنچانے پر معافی مانگنے کے ساتھ ساتھ ان کی شکایت کی تحقیق کرنے کے لیے ان سے ان کا پورا نام اور پتہ پوچھا۔

بھارتی شائقین کو شدید غصہ ہے کہ برٹش ایئر ویز تنڈولکر جیسی شخصیت سے واقف نہیں ہے اور انھوں نے سوشل میڈیا پر کمپنی کو شدید تنقید کا نشانہ بنایا ہے۔

برٹش ایئر ویز کی ٹویٹ کے رد عمل میں کچھ بھارتی شہریوں کی ٹویٹس اتنی جذباتی تھیں کہ کچھ لوگوں نے ملک کے وزیر اعظم نریندر مودی سے مطالبہ کیا ہے کو وہ برطانیہ کا دورہ منسوخ کر دیں۔

ٹوئٹر پر بھارت کے ٹرینڈز میں اس وقت برٹش ایئرویز سب سے زیادہ زیر بحث ہے۔

بھارت کے زیر انتظام کشمیر کے سابق وزیر اعلیٰ جیسے سیاست دانوں نے بھی اس موضوع پر تبصرہ کیا ہے۔

بھارتی تنڈولکر کے حوالے سے خاص طور پر حساس ہوتے ہیں۔

مقبول ترین کرکٹر کو دنیا بھر میں کرکٹ کے سب سے بہترین بلے بازوں میں سے ایک سمجھا جاتا ہے، یہاں تک کہ لوگ انھیں اکثر ’خدا‘ کہتے ہیں۔

کئی مندر بھی تنڈولکر کے نام سے منسوب کیے گئے ہیں۔

موجودہ واقعہ وہ پہلا واقعہ نہیں ہے جس میں بھارتی شہریوں نے تنڈولکر کے حوالے سے شدید غصے کا اظہار کیا ہے۔

سنہ 2014 میں ٹینس سٹار ماریا شاراپووا کو شدید غصے اور تنقید کا نشانہ بنایا گیا تھاجب انھوں نے اعتراف کیا تھا کہ انھیں پتہ نہیں تھا کہ تنڈولکر کون ہیں۔