بہار: اسمبلی انتخابات کے لیے پہلے مرحلے کی پولنگ

بھارت کی مشرقی ریاست بہار میں اسمبلی انتخابات کے پہلے مرحلے میں پولنگ کا آغاز صبح سات بجے ہوا اور یہ شام سات بجے تک جاری رہے گی۔

پہلے مرحلے میں 10 ضلع کی 49 نشستوں کے لیے ووٹ ڈالے جا رہے ہیں۔ پہلے مرحلے میں جن اضلع میں ووٹ ڈالے جا رہے ہیں اس میں سمستی پور، بیگوسرائے، کھگڑیا، بھاگل پور، بانکا، مونگیر، لکھی سرائے، شیخ پورا، نوادہ اور جموئی شامل ہیں۔

ووٹ ڈالنے کا وقت شام کے پانچ بجے تک ہے لیکن بعض ان علاقوں میں جہاں ماؤنواز باغی سرگرم ہیں وہاں سکیورٹی وجوہات کے سبب تین بجے اور بعض مقامات پر چار بجے تک پولنگ کا کام مکمل کر لیا جائے گا۔

پہلے مرحلے میں 49 سیٹوں کے لیے کل 583 امیدوار اپنی قسمت آزما رہے ہیں۔ پولنگ کے لیے سکیورٹی کے سخت انتظامات کیے گئے ہیں۔

اس میں حکمراں جنتادل یونائیٹیڈ کی قیادت والے اتحاد کی جانب سے جے ڈی یو کے 24 نشستوں پر، لالو پرساد کی جماعت آر جے ڈی کے 17 اور کانگریس پارٹی آٹھ سیٹوں پر انتخاب لڑ رہی ہے۔

دوسری جانب بھارتیہ جنتا پارٹی کی قیادت والے اتحاد میں بی جے پی نے 27، لوک جن شکتی پارٹی 13، قومی لوک سمتا پارٹی چھ اور بھارتی عوامی مورچہ نے تین سیٹوں پر اپنے امیدوار کھڑے کیے ہیں۔

ان 49 سیٹوں کے لیے کل 1،35،72،339 رائے دہندگان ہیں۔ ان میں سے 72 لاکھ سے زیادہ مرد اور تقریباً 63 لاکھ خواتین ووٹر شامل ہیں۔ اس مرحلے میں 54 خواتین امیدوار بھی میدان میں ہیں۔

پہلے مرحلے میں جن بڑے ریاستی رہنماؤں کی قسمت کا فیصلہ ہونا ہے اس میں سے حکمراں جنتا دل یونائیٹڈ کے وزیر وجے چودھری اور دامودر راوت ہیں۔ جبکہ بھارتی جنتا پارٹی کی رینو کشواہا، لوک جن شکتی پارٹی کے ریاستی صدر پشوپتی پارس اور کانگریس کے سدانند سنگھ اہم ہیں۔

نوادہ میں موجود بی بی سی کے نامہ نگار سلمان راوی کے مطابق اس انتخاب میں کوئی خاص لہر نہیں دیکھی جا رہی ہے۔

ریاست بہار میں اس بار پانچ مرحلوں میں ووٹ ڈالے جائیں گے اور ووٹوں کی گنتی آٹھ نومبر کو ہوگی۔