جنرل بپن راوت اور اہلیہ کی ہلاکت: جائے حادثہ کے قریب موجود عینی شاہد نے کیا دیکھا؟
،تصویر کا ذریعہGetty Images
'میں نے اپنی آنکھوں سے صرف ایک آدمی کو دیکھا، وہ جل رہا تھا اور پھر وہ نیچے گر گیا، میں ہل گیا'۔
یہ کہنا ہے بدھ کو ہونے والے اس ہیلی کاپٹر حادثے کی جگہ کے قریب موجود عینی شاہد کا جس میں ملک کے پہلے چیف آف ڈیفنس سٹاف (سی ڈی ایس) جنرل بپن راوت ہلاک ہوگئے ہیں۔
اس حادثے میں جنرل راوت کی اہلیہ مدھولیکا راوت اور ہیلی کاپٹر میں سوار دیگر 11 افراد بھی ہلاک ہوئے ہیں۔ حادثے میں گروپ کیپٹن ورون سنگھ ہی زندہ بچے ہیں جن کا علاج جاری ہے۔
انڈین فضائیہ کے ایم آئی 17 وی 5 ہیلی کاپٹر میں جنرل راوت اور ان کی اہلیہ سمیت 14 افراد سوار تھے۔ یہ ہیلی کاپٹر تمل ناڈو کے کنور ضلع میں گر کر تباہ ہوا ہے۔
یہ بھی پڑھیے
End of سب سے زیادہ پڑھی جانے والی
انڈین فضائیہ کے مطابق جنرل بپن راوت ڈیفینس سروسز سٹاف کالج جا رہے تھے جہاں اُنھیں سٹاف کورس کے طلبہ افسران اور اساتذہ سے خطاب کرنا تھا۔
فضائیہ نے کہا ہے کہ حادثے کی وجوہات کی تحقیقات کی جا رہی ہیں۔
60 سالہ کرشنا سوامی اس حادثے کے عینی شاہد ہیں، وہ اس جگہ کے قریب رہتے ہیں جہاں یہ حادثہ پیش آیا۔
،تصویر کا ذریعہMADAN PRASAD/BBC
عینی شاہد نے کیا دیکھا؟
ان کا کہنا ہے کہ 'میں ننجاپا سوتھیرام کا رہنے والا ہوں۔ میں گھر کے لیے لکڑیاں لینے نکلا تھا۔ پائپ ٹوٹنے کی وجہ سے گھر میں پانی بھرا ہوا تھا۔ چندر کمار اور میں اس کی مرمت کر رہے تھے۔ تبھی ہم نے ایک زوردار دھماکے کی آواز سنی'۔
وہ مزید بتاتے ہیں 'دھماکے سے بجلی کے کھمبے تک ہل گئے۔ درخت اکھڑ گئے۔ جب ہم نے دیکھا کہ کیا ہوا تو وہاں دھواں اٹھ رہا تھا، دھوئیں نے پورے علاقے کو ڈھانپ لیا تھا، وہاں دھند چھائی ہوئی تھی۔ درخت کے اوپر آگ کے شعلے بلند ہو رہے تھے۔ میں نے اپنی آنکھوں سے صرف ایک آدمی کو دیکھا، وہ جل رہا تھا اور پھر وہ نیچے گر گیا، میں ہل گیا۔ میں دوڑتا ہوا واپس آیا اور میں نے لوگوں سے کہا کہ فائر بریگیڈ اور پولیس کو بلاؤ، کچھ دیر بعد اہلکار بھی آگئے۔ میں نے لاش کو لے جاتے ہوئے نہیں دیکھا، میں صدمے میں تھا گھر آکر لیٹ گیا'۔
