دنیا میں سب سے چھوٹا قد رکھنے والے شخص کا نمونیا سے انتقال

دنیا کے سب سے زیادہ چھوٹے قد کے شخص کا 27 برس کی عمر میں نمونیا کی وجہ سے انتقال ہوگیا ہے۔

کھگیندرا تھاپا ماگر کا قد محض دو فٹ اور دو عشاریہ چار ایک انچ (2'2.41") تھا جو گینیز بک آف ورلڈ ریکارڈز کے مطابق چلنے کے قابل کسی بھی شخص کا سب سے کم قد ہے۔

لواحقین کے مطابق ان کا انتقال جمعہ 17 جنوری کو نیپال کے ایک اسپتال میں ہوا۔

ان کا تعلق نیپال سے تھا اور ان کی عمر 27 برس تھی۔

چھوٹے قد کا اعزاز

سنہ 2010 میں اپنے سب سے چھوٹے قد کی وجہ سے گینیز بک آف ورلڈ ریکارڈز میں نام درج کروانے کے بعد وہ دنیا بھر میں لوگوں کی دلچسپی کا مرکز بنے اور یورپ اور امریکا سمیت کئی ملکوں میں ٹی وی شوز میں حصہ لیا۔

کم قامتی کا ریکارڈ اپنے نام کرواتے وقت ان کی عمر 18 برس تھی۔

ان کا قد چھوٹا مگر حوصلہ ہمالیہ پہاڑ کی طرح بلند تھا۔ انعام ملنے کے بعد انھوں نے کہا تھا، ’میں خود کو چھوٹا انسان نہیں سمجھتا۔ میں بڑا انسان ہوں۔ مجھے امید ہے کہ یہ اعزاز میرے اور میرے خاندان کے لیے ایک اچھے گھر کے حصول میں مددگار ہوگا۔‘

گینیز بک آف ورلڈ ریکارڈز نے ان کے انتقال پر انھیں خراج عقیدت پیش کرتے ہوئے کہا ہے کہ ماگر نے 'زندگی سے بھر پور لطف اٹھانے کے راستے میں اپنی کوتاہ قامتی کو حائل نہیں ہونے دیا۔'

کھگیندرا تھاپا ماگر کی زندگی تصاویر میں