انڈیا: مذہبی تقریب کے لیے ہاتھیوں کی منتقلی کا حکم ’شدید گرمی کے پیشِ نظر’ معطل
،تصویر کا ذریعہAFP
انڈیا کی ریاست آسام میں محکمہ جنگلی حیات کے حکام نے چار ہاتھیوں کو 3100 کلومیٹر طویل سفر پر بھیجنے کے منصوبے پر عملدرآمد روک دیا ہے۔
ان ہاتھیوں کو ریاست گجرات کے شہر احمد آباد کے ایک مندر میں مذہبی رسومات کی ادائیگی کے لیے ریاست آسام سے بھیجا جانا تھا۔
مگر جانوروں کے حقوق کے لیے کام کرنے والی تنظیموں نے اس فیصلے پر احتجاج کرتے ہوئے موقف اپنایا کہ شدید گرمی کے موسم میں یہ طویل سفر جانوروں کے لیے خطرناک ہو سکتا ہے۔
ان تنظیموں نے خدشات کا اظہار کیا تھا کہ سفر دوران شدید درجہ حرارت جانوروں کی موت کا بھی سبب بن سکتا ہے۔
یہ بھی پڑھیے
End of سب سے زیادہ پڑھی جانے والی
متروک کیے گئے پلان کے مطابق ان ہاتھیوں کو جگن ناتھ مندر میں ہونے والی سالانہ رتھ یاترا میں شرکت کے لیے چار جولائی سے پہلے احمد آباد پہنچنا تھا۔
آسام سے احمد آباد تک کا فاصلہ ٹرین کے ذریعے طے کرنے میں عموماً تین سے چار دن لگتے ہیں۔
،تصویر کا ذریعہGetty Images
جمعرات کو ایک تحریری حکم نامے میں آسام کے محکمہ جنگلی حیات کی اعلیٰ ترین اہلکار رنجنا گپتا نے کہا کہ ہاتھیوں کی منتقلی کی اجازت ’معطل‘ کی جا رہی ہے۔
ایک پیراگراف پر مشتمل مختصر حکم نامے میں کہا گیا کہ یہ فیصلہ ’انڈیا کے شمال مغربی علاقوں میں گرمی کی حالیہ لہر کے پیشِ نظر‘ کیا جا رہا ہے۔
جانوروں کے حقوق اور ان کی حفاظت کے لیے سرگرم کارکنان نے، جنھوں نے ہاتھیوں کی منتقلی کے منصوبے کو ظالمانہ اور مکمل طور پر غیر انسانی قرار دیا تھا، اس نئے حکم نامے کا خیر مقدم کیا ہے۔
کئی افراد نے سوالات اٹھائے تھے کہ جب ہاتھیوں کے مجوزہ روٹ پر واقع کئی مقامات پر درجہ حرارت 40 ڈگری سے بھی زیادہ ہے تو ایسے وقت میں جانوروں کو کیوں منتقل کیا جا رہا ہے۔
،تصویر کا ذریعہGetty Images
جانوروں کے حقوق کے لیے کام کرنے والے چند کارکنوں نے گوہاٹی ہائی کورٹ میں پٹیشن تک دائر کی تھی جس میں محکمہ جنگلی حیات کے حکام سے جانوروں کے تحفظ اور ان کی صحت کو مدِ نظر رکھتے ہوئے نیا حکم نامہ جاری کرنے کی درخواست کی گئی تھی۔
گذشتہ چند برسوں میں وزیرِ اعظم نریندر مودی نے، جو کہ خود بھی گجرات سے تعلق رکھتے ہیں، اس میلے اور ہاتھیوں کے جلوس میں شرکت کر رہے ہیں مگر مندر کے حکام کا کہنا ہے کہ اس برس ان کی شرکت کی امید نہیں کی جا رہی۔
مندر کے ایک ٹرسٹی نے بی بی سی گجراتی کو بتایا کہ مندر کے اپنے تین ہاتھی گذشتہ سال اپنی طبعی عمر کو پہنچنے کے بعد مر گئے تھے اور اس وجہ سے انھوں نے آسام سے ہاتھی ’ادھار‘ لینے کا فیصلہ کیا تھا۔
