احمد رضا بی بی سی اردو ڈاٹ کام، کراچی

	امیدواروں کے ناموں کی حتمی منظوری بلاول ہاؤس کراچی میں پیپلز پارٹی کے پارلیمانی بورڈ کے بورڈ کے اجلاس میں دی گئی

امیدواروں کے ناموں کی حتمی منظوری بلاول ہاؤس کراچی میں پیپلز پارٹی کے پارلیمانی بورڈ کے بورڈ کے اجلاس میں دی گئی جس کی صدارت ملک کے صدر اور پارٹی کے شریک چئرمین آصف علی زرداری نے کی۔

پیپلز پارٹی کی جانب سے نامزد کئے گئے امیدواروں میں وزیر اعظم کے مشیر داخلہ رحمن ملک اور وفاقی وزیر قانون فاروق ایچ نائیک بھی شامل ہیں جنہیں صوبہ سندھ سے ٹیکنوکریٹس کے لئے مخصوص نشستوں کے لئے نامزد کیا گیا ہے۔

فاروق ایچ نائیک ان سنیٹروں میں شامل ہیں جو اگلے ماہ ریٹائر ہورہے ہیں۔

اس کے علاوہ پنجاب سے نامزد ہونے والے امیدواروں میں پارٹی کے سیکریٹری جنرل جہانگیر بدر اور سابق وفاقی وزیر بیگم عابدہ حسین کی بیٹی صغری امام بھی شامل ہیں۔

صوبہ سندھ سے ہی جنرل نشستوں پر گل محمد لاٹ، اسلام الدین شیخ، مولا بخش چانڈیو، ڈاکٹر کھٹومل جیون اور سید فیصل رضا عابدی اور خواتین کے لئے مخصوص نشست کے لئے الماس پروین نامزد ہوئی ہیں۔

گل محمد لاٹ ان دنوں وزیر اعلیٰ سندھ سید قائم علی شاہ کے مشیر برائے اینٹی کرپشن ہیں۔

ڈاکٹر کھٹو مل جیون شیڈول کاسٹ سے تعلق رکھتے ہیں۔ پاکستان میں رہائش پذیر دلتوں کی یہ عمومی شکایت رہی ہے کہ انہیں پارلیمینٹ میں جائز نمائندگی نہیں ملتی۔

صوبہ پنجاب سے جنرل نشستوں کے لئے جہانگیر بدر کے بعد پیپلز پارٹی کے دوسرے امیدوار صلاح الدین ڈوگر ہیں جبکہ خواتین کے لئے مخصوص نشست کے لئے صغری امام کے علاوہ ٹیکنوکریٹ کی نشست کے لیے وکیل رہنما کاظم خان کو نامزد کیا گیا ہے۔

بلوچستان سے جنرل نشستوں کے لئے پیپلز پارٹی کے صوبائی صدر نوابزادہ لشکر رئیسانی، اورنگزیب عالمگیر، صابر بلوچ، ثریا امیرالدین، حنا گلزار، عبداللہ موسی زئی، سردار طاہر ایڈووکیٹ، ٹیکنوکریٹ کی نشست کے لئے سیف اللہ پراچہ، صوبہ سرحد سے جنرل نشستوں کے لیے گلزار احمد خان، وقار احمد خان، سردار علی خان، ٹیکنوکریٹ کی نشست کے لئے عدنان خان اور خواتین کے لئے مخصوص نشست پر فرحت عباس نامزد ہوئی ہیں۔

وفاقی دارالحکومت اسلام آباد کے لئے پیپلز پارٹی نے دو امیدواروں کو نامزد کیا ہے جن میں نیر حسین بخاری اور ڈاکٹر سعیدہ اقبال شامل ہیں۔

الیکشن کمیشن کے اعلان کردہ انتخابی شیڈول کے مطابق کاغذات نامزدگی گیارہ سے تیرہ فروری تک جمع کرائے جاسکتے ہیں تاہم الیکشن کمیشن کے مطابق بدھ کو پہلے دن ملک میں کہیں کوئی کاغذات نامزدگی داخل نہیں کرائے گئے۔

ادھر انتخابات کے سلسلے میں سیاسی جماعتوں کے درمیان رابطوں کا سلسلہ جاری ہے تاہم حکومت اور حزب اختلاف میں شامل کسی جماعت نے بھی اب تک مفاہمت کا اعلان نہیں کیا ہے۔

مسلم لیگ نون کے سیکریٹری اطلاعات اقبال ظفر جھگڑا نے لاہور میں پارٹی کے اجلاس کے بعد صحافیوں کو بتایا کہ ان کی جماعت کے امیدواروں کی نامزدگیوں کے سلسلے میں پارٹی کے پارلیمانی بورڈ کا اجلاس جمعرات کو ہوگا۔

ایک سوال کے جواب میں انہوں نے کہا کہ انتخابات کے سلسلے میں ان کی جماعت مسلم لیگ قاف کے علاوہ دوسری جماعتوں سے بھی بات کرسکتی ہے۔