دلاورخان وزیر بی بی سی اردو ڈاٹ کام، پشاور

دونوں کوایک ہفتہ پہلے میرانشاہ کے قریب نامعلوم نقاب پوشوں نے اغواء کرلیا تھا

پولیٹکل حکام کے مطابق جمعہ کو شمالی وزیرستان کے صدر مقام میرانشاہ میں رزمک اڈہ کے قریب مقامی لوگوں کو دو لاشیں ملی ہیں جنہیں فائرنگ کرکے ہلاک کیاگیا ہے۔ہلاک ہونے والوں میں عالم پیر نامی شخص کا تعلق ضلع کرک سے بتایا جاتا ہے جو کافی عرصے سے میرانشاہ میں مقیم تھا۔ محمد نواز المعروف خان جو واپڈہ میں ملزم تھا مقامی بتایا جاتا ہے۔لاشوں کے ساتھ ایک خط بھی ملا ہے جس میں کہا گیا تھا کہ مقتولین امریکیوں کے لیے علاقے میں جاسوسی کرتے تھے اس لیے ان کو ہلاک کیاگیا۔

عینی شاہدین کے مطابق مقتولین کو کئی گولیاں ماری گئی ہیں۔ مقامی لوگوں کے مطابق خط میں ہلاک شدگان کے نام محمد نواز اور عالم پیر خٹک لکھا گیا ہے۔

مقامی لوگوں کے مطابق دونوں کوایک ہفتہ پہلے میرانشاہ کے قریب سے نامعلوم نقاب پوشوں نے اغواء کرلیا تھا۔ گزشتہ چند ہفتوں کے دوران وزیرستان میں جاسوسی کے الزام کے تحت قتل کے واقعات میں اضافہ ہوا ہے۔

اس سے پہلے اس قسم کے واقعات میں جنوبی اور شمالی وزیرستان میں سرکاری اور مبینہ طور پر حکومت کے حمایت یافتہ تین سو سے زائد قبائلیوں اور صحافیوں کو ہلاک کیا جاچکا ہے۔

یاد رہے کہ شمالی وزیرستان میں مقامی طالبان اور حکومت کے درمیان دو سال پہلے ایک امن معاہدے میں طالبان نے علاقے میں ٹارگٹ کلنگ کے خاتمے کی یقین دہانی کرائی تھی۔