دلاور خان وزیر بی بی سی اردو ڈاٹ کام، ڈیرہ اسماعیل خان

	ہلاک ہونے والوں میں مقامی اور ’پنجابی‘ طالبان تھے: مقامی انتظامیہ

سال نو کا پہلا امریکی ڈرون حملہ

مقامی لوگوں کے مطابق ہلاک ہونے والوں میں مقامی اور ’پنجابی‘ طالبان بتائے جاتے ہیں۔

مقامی انتظامیہ کا کہنا ہے کہ جمعہ کو دس بجے کے قریب جنوبی وزیرستان کے سب ڈویژن لدھا سے تین کلومیٹر دور مغرب کی جانب میدان نارائی کے علاقے سلطانہ میں امریکی جاسوس طیاروں سے دو میزائل فائر کیے گئے ہیں۔ اس حملے کے نتیجے میں تین افراد ہلاک ہوگئے ہیں۔ انتظامیہ کے مطابق ہلاک ہونے والوں میں مقامی اور ’پنجابی‘ طالبان شامل ہیں۔

مقامی لوگوں کا کہنا ہے کہ ہلاک ہونے والوں میں کوئی غیر ملکی عرب شامل نہیں ہے اور ہلاک ہونے والے مقامی اور پنجاب کے رہنے والے طالبان ہیں۔

’پنجابی طالبان‘  مقامی انتظامیہ کا کہنا ہے کہ جمعہ کو دس بجے کے قریب جنوبی وزیرستان کے سب ڈویژن لدھا سے تین کلومیٹر دور مغرب کی جانب میدان نارائی کے علاقے سلطانہ میں امریکی جاسوس طیاروں سے دو میزائل فائر کیے گئے ہیں۔ اس حملے کے نتیجے میں تین افراد ہلاک ہوگئے ہیں۔ انتظامیہ کے مطابق ہلاک ہونے والوں میں مقامی اور ’پنجابی‘ طالبان شامل ہیں

مقامی لوگوں کے مطابق میزائل حملہ ایک سرکاری پرائمری سکول پر ہوا ہے اس سکول میں طالبان موجود تھے۔ ان کا کہنا ہے کہ یہ معلوم نہیں ہے کہ ہلاک ہونے والوں میں کوئی اہم شخصیت شامل ہے یا نہیں۔

مقامی لوگوں کا کہنا ہے کہ میزائل حملے کے بعد مقامی لوگوں نے ملبہ سے تین لاشوں کو نکال لیا اور تین زخمیوں کو مکین کے ایک نجی ہسپتال میں داخل کرا دیاگیا ہے۔

یاد رہے کہ اس پہلے بھی جنوبی وزیرستان کے صدر مقام وانا میں امریکہ کی جانب سے مقامی طالبان یا عام لوگوں کے گھروں کو جاسوس طیاروں یا میزائل حملے سے نشانہ بنایا گیا ہے جس کے نتیجے میں مقامی طالبان سمیت مقامی لوگ بھی ہلاک ہوگئے ہیں۔

امریکہ کے نو منتخب صدر باراک اوباما پہلے ہی یہ اعلان کر چکے ہیں کہ دہشت گردی کے خلاف جنگ میں وہ اپنی توجہ افغانستان پر مرکوز کریں گے اور وہاں جلد ہی امریکی فوج کی تعداد میں اضافے کا عمل شروع ہوجائے گا۔

مبصرین کا خیال ہے کہ آنے والے چند ہفتوں میں پاکستان اور افغانستان کی سرحد اور پاکستان کے قبائلی علاقوں میں فوجی سرگرمیاں تیز ہو جائیں گی کیونکہ باراک اوباما کا خیال ہے کہ پاکستان کے قبائلی علاقوں میں طالبان کو محفوظ پناہ گاہیں حاصل ہیں۔

یہ اطلاعات بھی ہیں کہ امریکہ افغانستان میں طالبان کا مقابلہ کرنے کے لیے مقامی ملیشیائیں قائم اور منظم کرنے کی کوشش کرے گا جیسا کہ اس نے عراق میں کیا تھا۔