عزیزاللہ خان بی بی سی اردو ڈاٹ کام، کوئٹہ

	اقوام متحدہ نے کوئٹہ میں اپنے اہلکار کے اغوا کی تصدیق کی ہے

اس واقعہ کی ابھی تک کسی نے ذمہ داری قبول نہیں کی ہے۔

کوئٹہ کے سپرنٹنڈنٹ پولیس خالد مسعود نے بتایا کہ پیر کی صبح یو این ایچ سی آر کے بلوچستان کے سربراہ جان سولیکی چمن ہاؤسنگ سکیم میں اپنے گھر سے دفتر جا رہے تھے کہ راستے میں چھوٹی گاڑی میں سوار نامعلوم افراد نے انھیں روکنے کی کوشش کی اور پھر فائرنگ کی جس سے ان کا ڈرائیور ہلاک ہوگیا۔ ڈرائیور کا نام سید ھاشم بتایا گیا ہے۔

خالد مسعود کے مطابق نامعلوم افراد یو این ایچ سی آر کے صوبائی سربراہ کو اپنے ساتھ لے گئے ہیں۔

اقوام متحدہ کے حکام نے خدشہ ظاہر کیا ہے کہ ان کے ایک اور ملازم کو اغوا کیا گیا ہے لیکن ان کا نام ظاہر نہیں کیا گیا۔

اس واقعہ کے بعد شہر میں حفاظتی انتظامات بڑھا دیے گئے ہیں اور تمام راستوں پر قانون نافذ کرنے والے اہلکاروں کی تعداد بڑھا دی گئی ہے۔

گزشتہ ہفتے ہزارہ ڈیموکریٹک پارٹی کے رہنما کی ہلاکت کے بعد کوئٹہ میں فرنٹیئر کور یعنی نیم فوجی دستوں کی بھاری نفری تعینات ہے اور جس علاقے میں یہ واقعہ پیش آیا ہے وہاں بھی قانون نافذ کرنے والے اداروں کے ناکے موجود تھے۔

گزشتہ ایک ہفتے سے شہر میں ایف سی کی گاڑیاں جن میں بکتر بند گاڑیاں بھی شامل ہیں، گشت کر رہی ہیں اور جگہ جگہ گاڑیوں کی چیکنگ بھی کی جاتی ہے۔

چمن ہاؤسنگ سکیم میں زیادہ تر امیر افراد اور غیر ملکی رہائش پذیر ہیں۔ جان سولیکی امریکی شہری ہیں اور ان کی رہائش اور دفتر چمن ہاؤسنگ سکیم میں واقع ہے۔

ایسی اطلاعات ہیں کہ کوئٹہ میں غیر ملکیوں کی سرگرمیاں دفاتر تک محدود کر دی گئی ہیں لیکن اقوام متحدہ کے حکام کا کہنا ہے کہ اب تک اس طرح کے کوئی تحریری احکامات جاری نہیں ہو ئے ہیں۔