شہزاد ملک بی بی سی اردو ڈاٹ کام، اسلام آباد

	صدر اور وزیر اعظم کے درمیان اختیارات کے توازن کا فیصلہ پارلیمنٹ کرے گی

منگل کو اسلام آباد میں ماحولیاتی تبدیلیوں کے بارے میں ایک سمینار سے خطاب کے بعد میڈیا کے نمائندوں سے گفتگو کرتے ہوئے اُنہوں نے کہا کہ اس ضمن میں پارلیمانی پارٹی کا اجلاس طلب کیا جائے گا جس میں اس کمیٹی کی تشکیل کی جائے گی۔

انہوں نے کہا کہ ابھی تک متحدہ قومی موومنٹ کی طرف سے سترہویں ترمیم کے خاتمے کے لیے آئینی ترمیمی بل قومی اسمبلی میں پیش کیا گیا ہے جبکہ دیگر سیاسی جماعتیں بھی اس ضمن میں آئینی ترمیمی بل پارلیمنٹ میں پیش کریں گی۔

انہوں نے کہا کہ سترہویں ترمیم کے خاتمے کے لیے پاکستان پیپلز پارٹی نے بھی تمام سیاسی جماعتوں کو بھی ایک مسودہ بھیجا ہے اور یہ کمیٹی اس مسودے کا بھی جائزہ لے گی۔

ایک سوال کے جواب میں اُنہوں نے کہا کہ صدر اور وزیر اعظم کے درمیان اختیارات کے توازن کا فیصلہ پارلیمنٹ کرے گی۔وزیر اعظم نے کہا کہ پارلیمنٹ تمام فیصلے کرنے میں با اختیار ہے۔

ایک اور سوال کے جواب میں اُنہوں نے کہا کہ سابق صدر جنرل ریٹائرڈ پرویز مشرف سے آرمی چیف کا عہدہ چھوڑنے کے حوالے سے سیاسی جماعتوں کے کردار کے علاوہ سابق وزیر اعظم اور پاکستان پیپلز پارٹی کی چیئرپرسن بینظیر بھٹو کا بھی اہم کردار ہے جنہوں نے عالمی برادری پر زور دیا کہ وہ سابق صدر پرویز مشرف پر یونیفارم اُتارنے کے لیے زور دیں۔

انہوں نے کہا کہ منتخب امریکی نائب صدر جو بائیڈن پاکستان اور جمہوریت کے حامی ہیں اور اُن کی خدمات کے صلے میں صدر پاکستان نے اُنہیں ہلالِ پاکستان کا اعزاز دیا ہے۔

ممبئی واقعہ کے بعد بھارتی حکومت کی طرف سے پاکستان کے ساتھ ہر قسم کے تعلقات منقطع کرنے کی دھمکی کے بارے میں ایک سوال کے جواب میں یوسف رضا گیلانی نے کہا کہ بھارتی حکمرانوں کو اس وقت عوام کا شدید دباؤ ہے جس کی وجہ سے وہ ایسے بیانات دیتے ہیں۔