عبدالحئی کاکڑ
بی بی سی اردوڈاٹ کام، پشاور |  |
| | | حملہ آوروں کا بڑا نشانہ ممبئی کا تاج ہوٹل جو ایک صدر پرانا ہے |
بھارت پر دہشت گرد حملوں نے گزشتہ کئی سالوں سے قدرے معمول پر آنے والے پاکستان انڈیا تعلقات کو جس شدید سفارتی جنگ میں بدل دیا ہے اس سے نہ صرف پورا خطہ ایک ممکنہ خطرے سے دو چار ہوا ہے بلکہ بھارتی الزامات کے بعد پاکستانی سکیورٹی حکام کی جانب سے جاری ہونے والے بیان نے افغانستان میں دہشت گردی کے خلاف جنگ کے نام پر موجود امریکہ کو بھی پریشانی میں مبتلا کردیا ہے۔ پاکستانی سکیورٹی حکام نے بظاہر دھمکی دیتے ہوئے کہا کہ ’اگر مشرقی سرحدوں پردباؤ بڑھتا ہے تو مغربی سرحد پرتعینات پاکستانی فوج کو بلایا جاسکتا ہے‘۔ یعنی دوسرے لفظوں میں یہ امریکہ اور دہشت گردی کے خلاف جنگ میں شامل دیگر مغربی ممالک کو ایک واضح پیغام ہے کہ پاکستان پاک افغان سرحد پر طالبان اور القاعدہ کے خلاف کارروائیوں سے دستبردار ہو جائے گا۔ پاکستان کی اس دھمکی کا بظاہر مقصد امریکہ اور دیگر مغربی ممالک کو بھارت کی صف میں کھڑا ہونے سے روکنا ہے اور اس بیان کے بعد یہ مقصد کچھ حد تک حاصل بھی کر لیا گیا۔ امریکہ کے قدرے سخت موقف میں لچک پیدا ہوئی اور وائٹ ہاؤس کی ترجمان ڈانا پیرینو نے ایک بریفنگ کے دوران کہا کہ ’امریکہ کو اس بات پر یقین نہیں ہے کہ پاکستان کی حکومت بھارت میں دہشت گرد حملوں میں ملوث ہے‘۔ پاکستان نے بر وقت ہوشیاری کے ساتھ پتہ پھینک کر کشیدہ صورتحال میں ایک حد تک امریکہ کو’غیر جانبدار‘ بنانے میں کامیابی حاصل تو کر لی لیکن اس بیان نےملک کے اندر قبائلی علاقوں اور صوبہ سرحد میں فوجی آپریشن کی مخالفت کرنے والی جماعتوں کے موقف کو درست قرار دیا کہ دہشت گردی کے خلاف جنگ پاکستان کی اپنی جنگ نہیں ہے۔ گیارہ ستمبر کے حملوں کے بعد جنرل ریٹائرڈ پرویز مشرف کی فوجی حکومت اور اٹھارہ فروری کے بعد پیپلز پارٹی کی قیادت میں قائم ہونے والی جمہوری حکومت کا موقف یہی رہا ہے کہ دہشت گردی کے خلاف جنگ امریکہ کی نہیں پاکستان کی اپنی جنگ ہے۔ پاکستان کی لبرل قوتیں اسی موقف کی حمایت کرتی آ رہی ہیں۔
| پاکستان کی اپنی جنگ  گیارہ ستمبر کے حملوں کے بعد جنرل ریٹائرڈ پرویز مشرف کی فوجی حکومت اور اٹھارہ فروری کے بعد پیپلز پارٹی کی قیادت میں قائم ہونے والی جمہوری حکومت کا موقف یہی رہا ہے کہ دہشت گردی کے خلاف جنگ امریکہ کی نہیں پاکستان کی اپنی جنگ ہے  |
لیکن دائیں بازو کی جماعتیں، جماعت اسلامی، اقتدار اور حزب اختلاف کی کشتیوں میں سوار مولانا فضل الرحمن کی جمیعت علما اسلام، تحریکِ انصاف، مسلم لیگ(ن) اور دائیں بازو کی جانب جھکاؤ رکھنے والے صحافی، دانشور، تجزیہ نگار اور زیادہ تر ریٹائرڈ فوجیوں کا موقف یہی رہا ہے کہ ’پاکستان اپنی نہیں بلکہ امریکہ کی جنگ لڑ رہا ہے‘۔ بھارت پر حملوں کے بعد پاکستان کے اس بیان سے مبصرین یہی معنی اخذ کر رہے ہیں کہ درونِ خانہ ’پاکستانی اسٹبلشمنٹ‘ طالبانائزیشن کو ملک کے لیے حقیقی خطرہ نہیں سمجھ رہی بلکہ یہ سرحد پار تعینات امریکی اور نیٹو فورسز کے لیے ایک خطرہ ہے کیونکہ اگر یہ پاکستان کے لیے حقیقی خطرہ ہوتا تو حکومت ایسا بیان دینے کی کبھی بھی جسارت نہیں کرتی۔ یہ بیان بعض تجزیہ نگاروں کی اس سوچ کو بھی ایک حد تک تقویت پہنچاتا ہے کہ خطے میں امریکہ کی موجودگی اور بھارتی اثر و نفوذ روکنے کے لیے پاکستان مبینہ شدت پسندوں کو اپنا ’اسٹریٹیجک اثاثہ‘ سمجھ رہا ہے اور یہ کہ دونوں ’فطری اتحادی‘ ہیں۔ کیونکہ دلیل یہ دی جاتی ہے کہ اس بیان کے بعد قبائلی علاقوں اور سوات میں فوج کے ساتھ برسرِ پیکار طالبان نے بھی اعلان کیا کہ ’وہ ملکی سرحدوں کی دفاع کی لیے پاکستانی فوج کے شانہ بشانہ لڑیں گے‘۔ | 
باجوڑ: قبائل اور حکومت میں معاہدہ
