رفعت اللہ اورکزئی بی بی سی اردو ڈاٹ کام، پشاور

	اس آپریشن میں تین سکیورٹی اہلکار بھی ہلاک ہوئے ہیں

پیر کو پشاور میں ذرائع ابلاغ کے نمائندوں کو بریفنگ دیتے ہوئے پولیس سربراہ نے کہا کہ پشاور کے قریب متنازعہ دیہات میں سکیورٹی فورسز کی جاری کاروائیوں میں عسکریت پسندوں کے کئی ٹھکانوں کو تباہ کیا گیا ہے۔ انہوں نے کہا کہ اب تک ہونی والی کارروائیوں میں پچیس شدت پسند مارے گئے اور چالیس کو گرفتار کرلیاگیا ہے جن سے تفتیش جاری ہے۔ اس آپریشن میں تین سکیورٹی اہلکار بھی ہلاک ہوئے ہیں۔

انہوں نے کہا کہ گرفتار ہونے والے شرپسندوں سے بھاری مقدار میں بارودی مواد، خودکش جیکٹس اور دیگر دھماکہ خیز مواد بھی برامد کیا گیا ہے۔

آئی جی پولیس نے علاقے کے لوگوں سے کہا کہ وہ اپنے علاقے میں امن وامان برقرار رکھنے اور شرپسندوں کے خاتمے کے لیے سکیورٹی فورسز کے اہلکاروں سے تعاون کریں۔

اس موقع پر میڈیا کے نمائندوں کو مبینہ طور پر عسکریت پسندوں سے برآمد کیا گیا اسلحہ او گولہ بارود بھی دکھایا گیا۔

واضح رہے کہ سکیورٹی فورسز نے تقریباً دو ہفتے قبل قبائلی علاقے مہمند ایجنسی کے سرحد پر واقع پشاور اور ضلع چارسدہ کے پچیس متنازعہ دیہات میں عسکریت پسندوں کے خلاف آپریشن کا اغاز کیا تھا جو بدستور جاری ہے۔