نثار کھوکھر بی بی سی اردو ڈاٹ کام سکھر

	اخراجات کم کر دیے پھر بھی گزارہ مشکل سے ہوتا ہے

پاکستان میں روز بروز بڑھتی ہوئی مہنگائی نے عابد کی زندگی پر برے اثرات مرتب کیے ہیں ۔عابد کا کہنا ہے کہ سی ڈی شاپ کی تنحواہ سے چار بچوں ایک بیوی اور ماں باپ کے اخراجات پورے کرنا مشکل ہوگیا ہے ۔وہ پورا مہینہ ادھار لے کر گزارہ کرتے ہیں ۔

عابد کا کہنا ہےکہ جب سے ملک میں مہنگائی بڑھی ہے تب سے انہوں نےاپنےگھر کے ’فالتو‘ اخراجات بند یا کم کر دیےہیں ۔جب ان سے معلوم کیا کہ ان کی نظر میں وہ فالتو اخراجات کیا ہیں تو عابد نے کہا کہ اگر پہلے وہ ہر تین ماہ بعد اپنے لیے ایک سوٹ سلواتے تھے تو اب وہ چھ ماہ بعد کر دیا ہے ۔گھر سے مارکیٹ تک اگر پہلے سوزوکی یا رکشا میں آتے تھے تو وہ بند کر کے پیدل آنا شروع کیا ہے ۔

عابد نے اپنے اخراجات کے ساتھ ساتھ اہل خانہ کے بعض اخراجات بھی کم کردیے ہیں ۔ان کے مطابق اگر پہلے گھر میں ہفتے میں ایک مرتبہ گوشت پکاتے تھے تو وہ اب مہینے میں ایک مرتبہ کردیا ہے ۔بچوں کو چھٹی کے دن باہر لےجانا بند کردیا ہے ۔عابد کےمطابق اگر آپ بچوں کو پارک لے جائیں تو آپ کی جیب میں کم از کم پانچ سوروپے ہونے چاہیں ۔رکشا کا کرایہ ادا کرنے کے بعد اگر بچوں نے آئس کریم یا کسی اور چیز کےلیے ضد کردی تو آپ کیا کریں گے ؟ اس لیے انہوں نے بچوں کو باہر لے جانا ہی بند کردیا ہے ۔

عابد میرانی گریجوئٹ ہیں اور محکمہ پوسٹ آفس سے فارغ کیے گئے ملازم ہیں۔ عابد کو دو ہزار دو میں پوسٹ آفس میں کلرک کی نوکری ملی تھی مگر تین ماہ بعد انہیں ملازمت سے بقول ان کے بلا کسی وجہ کے فارغ کیا گیا تھا۔

سرکاری نوکری کی آس میں وہ روزانہ محکمہ پوسٹ آفس کے اعلی افسران کو اپنی درخواستیں فیکس کرتے رہتے ہیں ۔عابد کا کہنا ہے کہ کلرک کی تنخواہ بھی کم ہے مگر سرکاری ملازمت کےدوران تنخواہیں بڑھنے کی امید رہتی ہے ۔

عابد کے چار بچے ہیں جن میں سے تین سرکاری سکول میں پڑھتے ہیں ۔ان کاکہنا ہے خانگی سکولوں کی فیس اور یونیفارم اتنے مہنگے ہوگئے ہیں کہ ان کا حصول ان کے بس کی بات نہیں ہے ۔

عابد کا کہنا ہے کہ ان کی پریشانی تب بڑھ جاتی ہے جب گھر کا کوئی فرد بیمار پڑ جائے ۔ان کے مطابق بیماری کتنی معمولی ہی کیوں نہ ہو مگر انہیں اپنے عزیزوں یا رشتہ داروں سے ادھار لینا پڑتا ہے ۔جو وہ تنخواہ ملنے پر واپس کرتےہیں مگر ان کے گھر کا پورا بجٹ ڈسٹرب ہوجاتا ہے ۔