ایوب ترین بی بی سی اردو ڈاٹ کام، کوئٹہ

	کانوائے پر حملہ جبڑی گاؤں کے قریب کیا گیا(فائل فوٹو)

یہ واقعہ نال اور مشکے کے درمیانی علاقے پیش آیا اور اس دوران ایف سی کی جوابی فائرنگ سے ایک بلوچ مزاحمت کار ہلاک ہوگیا جبکہ تین کو زخمی حالت میں گرفتار کر لیا گیا۔

کوئٹہ میں ایف سی ذرائع کے مطابق گرفتارہونے والے بلوچ مزاحمت کاروں سے بڑی تعداد میں اسلحہ اور گولہ بارود بھی برآمد ہوا ہے۔

خضدار سے ساٹھ کلومیڑ کے فاصلے پر جبڑی گاؤں کے قریب اتوار کو اس وقت بعض نامعلوم مسلح افراد نے ایف سی قلات سکاؤٹس کے کمانڈر کرنل خلیل احمد کے کانوائے کو فائرنگ کا نشانہ بنایا جب وہ علاقے میں مشکوک بلوچ مزاحمت کاروں کی تلاش میں نکلے تھے۔

ایف سی ذرائع نے خیال ظاہر کیا ہے کہ حملہ آورں کا تعلق بلوچ مزاحمت کاروں کی شدت پسند تنظیم بلوچ لبریشن آرمی سے ہے لیکن ابھی تک بی ایل اے نے اس حملے کی ذمہ داری قبول نہیں کی ہے

فائرنگ کے اس واقعہ کے بعد ایف سی نے پورے علاقے میں تلاشی کا سلسلہ
شروع کر دیا ہے اور مزیدگرفتاریوں کا امکان ہے۔

واضح رہے کہ بلوچ مزاحمت کاروں نے اس سال ماہ رمضان میں یک طرفہ جنگ بندی کا اعلان کرتے ہوئے سکیورٹی فورسز اور ان بلوچوں کے خلاف کارروائیاں جاری رکھنے کا اعلان کیاتھا جو بقول ان کے بلوچ قومی تحریک کے خلاف حکومت کے لیے جاسوسی کرتے ہیں۔