شہزاد ملک بی بی سی اردو ڈاٹ کام، اسلام آباد

	حکومت کو بھی اپنے اخراجات میں کمی کرنا ہوگی

جمعرات کو میڈیا کے نمائندوں سے گفتگو کرتے ہوئے انہوں نے کہا کہ تمام سیاسی جماعتوں پر مشتمل پارلیمنٹ کی سولہ رکنی کمیٹی نے پارلیمنٹ کے بند کمرے میں ہونے والے اجلاس کو بامقصد بنا دیا ہے۔

واضح رہے کہ اس سے قبل پاکستان مسلم لیگ نواز نے پارلیمنٹ کے اس مشترکہ اجلاس میں دہشت گردی کے خلاف جنگ کے حوالے سے حکومت کی طرف سے دی جانے والی بریفنگ پر مایوسی کا اظہار کرتے ہوئے اس اجلاس کی کارروائی سے عوام کو آگاہ کرنے کا مطالبہ کیا تھا۔

راجہ ظفرالحق نے کہا کہ وزیر اعظم سید یوسف رضا گیلانی نے نواز لیگ کے قائد میاں محمد نواز شریف کی طرف سے دہشت گردی سے نمٹنے کے لیے خط کے ذریعے دی جانے والی تجاویز کا مثبت جواب دیا ہے۔

انہوں نے کہا کہ جس سیاسی بصیرت کا مظاہرہ یہ قرارداد تیار کرنے والی کمیٹی نے کیا ہے اُسی طرح کا مظاہرہ ان تجاویز پر عمل درآمد کرنے والی کمیٹی بھی کرے گی۔

ایک سوال کے جواب میں انہوں نے کہا کہ پوری دنیا اقتصادی بحران کی لپیٹ میں ہے اور اس صورتحال کے پیش نظر ہمیں اپنے معاملات کو خود دیکھنا ہوگا اور حکومت کو بھی اپنے اخراجات میں کمی کرنا ہوگی۔

راجہ ظفرالحق نے کہا کہ امریکہ میں صرف سترہ وزراء سے حکومت چل رہی ہے جبکہ پاکستان میں وزراء اور مشیروں کی تعداد میں روز بروز اضافہ ہوتا جا رہا ہے۔

ایک سوال کے جواب میں پاکستان مسلم لیگ نون کے چیئرمین نے کہا کہ اُن کی جماعت سپریم کورٹ کے معزول چیف جسٹس افتخار محمد چودھری سمیت دیگر معزول ججوں کی بحالی کے حوالے سے اپنے مؤقف سے پیچھے نہیں ہٹے گی اور اُن کی جماعت عدلیہ کی آزادی اور ججوں کی بحالی کے سلسلے میں وکلاء کی تحریک کے ساتھ ہیں۔