عبدالحئی کاکڑ بی بی سی اردوڈاٹ کام، پشاور

	سر میں گولی لگنے کے بعد مشکوک شخص جونہی زمین پر گرا تو اس دوران ایک دھماکہ ہوا

پولیس کا کہنا ہے کہ اس حملے میں چار افراد مارے گئے ہیں تاہم موقع پر موجود ایک سکیورٹی اہلکار کا کہنا ہے کہ اس واقعہ میں مبینہ خودکش حملہ آور سمیت پانچ افراد ہلاک اور اٹھارہ زخمی ہوگئے ہیں۔

صوبہ سرحد پولیس کے سربراہ ملک نوید نے بی بی سی کو بتایا کہ جمعرات کی دوپہر ایک مبینہ خودکش بمبار ضلع چارسدہ میں واقع عوامی نینشل پارٹی کے سربراہ اسفند یار ولی کی رہائش میں داخل ہونے کی کوشش کر رہے تھے کہ پولیس نے اسے مشکوک سمجھ کر گولی مار دی۔ ان کے بقول سر میں گولی لگنے کے بعد مشکوک شخص جونہی زمین پر گرا تو اس دوران ایک دھماکہ ہوا۔

ان کے مطابق دھماکے کے نتیجے میں ایک پولیس اہلکار، اسفندیار ولی کا ایک محافظ اور بینک کا ایک منیجر موقع پر ہی ہلاک ہوگئے ہیں۔

صوبہ سرحد پولیس کے سربراہ ملک نوید نے مزید کہا کہ مبینہ حملہ آور کا ہدف اسفند یار ولی کا حجرہ تھا جہاں پر وہ درجنوں افراد کے ساتھ موجود عید کی مبارکباد وصول کرنے میں مصروف تھے۔

آئی جی پولیس کے مطابق اسفندیار ولی خان جہاں بیٹھے ہوئے تھے اس جگہ سے یہ واقعہ تقریباً ستر گز دور ہوا ہے۔ ان کے بقول اس قسم کے حملوں کا خطرہ پہلے ہی موجود تھا اسی لیے وہاں پر پولیس کو الرٹ کردیا گیا تھا۔

موقع پر موجود ایک سکیورٹی اہلکار محمد اسحاق نے بی بی سی کو بتایا کہ وہ ڈیوٹی پر مامور تھے کہ تقریباً سترہ یا اٹھارہ سالہ لڑکا آیا اور اس نے رہائش گاہ کے سامنے نصب حفاظتی گیٹ کے سامنے تلاشی دینے سے انکار کرتے ہوئے اسفندیار ولی کی جانب بھاگنے کی کوشش کی۔

حملہ آور بلٹ پروف جیکٹ میں تھے  تلاشی سے انکار کے بعد پولیس اہلکاروں نے ان پر گولیاں چلا ئیں تاہم اس نے بلٹ پروف جیکٹ پہنی ہوئی تھی لیکن جب اس کے سر اور گلے میں گولی ماری گئی تو وہ زمین پر گر پڑے اور اس دوران ایک زوردار دھماکہ ہوا پولیس

چارسدہ ہسپتال کے ایم ایس ڈاکٹر نواز نے بی بی سی کو بتایا کہ ان کے پاس اب تک تین لاشیں اور اٹھارہ زخمی لائے گئے ہیں۔

ان کے بقول ہلاک ہونے والوں میں دو افراد کو سینے اور پیٹ میں گولیاں لگی ہیں جبکہ تیسرا شخص دھماکہ کے نتیجے میں ہلاک ہوا ہے۔

یاد رہے کہ صوبہ سرحد کی حکمران جماعت عوامی نینشل پارٹی دہشت گردی کے خلاف جنگ کی حمایت کر رہی ہے جس کی وجہ سے مبصرین کے بقول وہ علاقہ میں موجود شدت پسندوں کی نشانہ پر ہیں۔ اٹھارہ فروری کے انتخابات سے قبل بھی چارسدہ میں پارٹی کے ایک انتخابی جلسے پر حملہ ہوا تھا جس میں درجنوں افراد ہلاک و زخمی ہوئے تھے۔

ضلع سوات جہاں پر فوجی آپریشن جاری ہے عوامی نینشل پارٹی کے متعدد مقامی قائدین کو ’ٹارگٹ ’ کلنگ کا نشانہ بنایا گیاہے جبکہ پارٹی سے تعلق رکھنے والے وزراء اور اراکین کے گھروں پر حملے کیے گے ہیں۔تاہم تازہ حملے کی ذمہ داری کسی نے قبول نہیں کی ہے۔