نخبت ملک اسلام آباد

	بیشتر فلیٹس کے دروازے دھماکے کی شدت سے نہ صرف ٹوٹے بلکہ اڑ کر گرے اور کھڑکیوں کے شیشے کرچیوں میں بدل گئے

ایک طرف تو اسلام آباد کے رہائشی دھماکے کی شدت اور تباہی کا خیال کیے بغیر اپنے بچوں سمیت جائے حادثہ کو دیکھنے پہنچ گئے مگر میریئٹ ہوٹل کے بالکل پیچھے واقع گلشن جناح کالونی کے بچوں کو کہیں لے جانے کی ضرورت نہیں پڑی کیونکہ ان کے سامنے سب کچھ ہوا۔

میریٹ ہوٹل کے عقب میں واقع سترہ گریڈ کے سرکاری ملازمین کی رہائش گاہ گلشن جناح کالونی میں تین منزلہ عمارتوں میں دو سو ایک فلیٹ ہیں اور ان میں تقریباً ایک سو ستر خاندان آباد ہیں۔

یہاں موجود بیشتر فلیٹس کے دروازے دھماکے کی شدت سے نہ صرف ٹوٹے بلکہ اڑ کر گرے اور کھڑکیوں کے شیشے کرچیوں میں بدل گئے۔ نہ صرف یہ بلکہ ان گھروں میں سجاوٹ کے سامان اور فرنیچر کو بھی شدید نقصان پہنچا۔

مسز زاہد ان فلیٹس کی تیسری منزل پر اپنے شوہر اور بچوں کے ساتھ چودہ سال سے رہ رہی ہیں۔ دھماکے کے وقت وہ کالونی کے پارک میں بنچ پر اپنے بچوں کے ساتھ بیٹھی تھیں۔ آس پاس سے شیشے کے ٹکڑے ان پر آ کر لگے جس سے وہ اور ان کے بچے زخمی ہوئے۔

اس ساری صورتحال کو کانپتی آواز میں بیان کرنے کے بعد نم آنکھیں لیے انہوں نے کہا ’چیخیں مار کر رونے کو دل کرتا ہے۔ بچوں کو اب سمجھانا پڑ رہا ہے کہ جیسے اللہ نے موت لکھی ہے وہ آنی ہے۔ ہم باہر کے ملک میں موجود جائیدادوں کے مالک یا وڈیرے تو نہیں جو بھاگ جائیں یہاں سے۔‘

بھاگ بھی نہیں سکتے  ’چیخیں مار کر رونے کو دل کرتا ہے۔ بچوں کو اب سمجھانا پڑ رہا ہے کہ جیسے اللہ نے موت لکھی ہے وہ آنی ہے۔ ہم باہر کے ملک میں موجود جائیدادوں کے مالک یا وڈیرے تو نہیں جو بھاگ جائیں یہاں سے۔ مسز زاہد

’ہم حکومت کے دل میں جھانک کر تو نہیں دیکھ سکتے۔ ہمیں نہیں پتہ کون کر رہا ہے مگر سوچتے ہیں کہ ملک میں ہو کیا رہا ہے۔ میرے بچے ہمیشہ اکیلے سوتے تھے مگر اب وہ اپنے کمرے میں جانے کو تیار نہیں۔‘

مسز شکیل انہی فلیٹس میں پچھلے گیارہ سال سے اپنے شوہر اور بچوں کے ہمراہ گراونڈ فلور پر رہتی ہیں۔ ان کی چھ سالہ بیٹی دھماکے کی رات سے ان کی گود سے الگ نہیں ہو رہی۔ ان کا کہنا ہے کہ یہ سب کچھ ناقابل برداشت ہے۔ ’ملک میں ہر چیز کی قیمت بڑھ گئی ہے اور ہم برداشت کر رہے ہیں ۔۔۔ مگر یہ سب برداشت نہیں ہوتا۔ کوئی مہم شروع کر کے اس دہشت گردی کو ختم کریں۔‘

ہر چیز برداشت پر یہ نہیں  ملک میں ہر چیز کی قیمت بڑھ گئی ہے۔ برداشت کر رہے ہیں ۔۔۔ مگر یہ سب برداشت نہیں ہوتا۔ مہم شروع کر کے اس دہشت گردی کو ختم کریں۔ مسز شکیل

آئمہ کا نو سالہ بھائی فیضان انتہائی معصومیت سے دھماکے کا منظر کھینچتا ہے جیسے کسی فلم کی کہانی سنا رہا ہو۔

مسز حمید اپنے گھر میں ہونے والے نقصان سے اتنی پریشان نہیں جتنی وہ اپنے اور کالونی میں رہنے والے تمام بچوں کے لیے فکر مند ہیں۔ ان کا کہنا ہے کہ دھماکے کے بعد سے بچوں نے اس بلڈنگ کےاحاطے میں موجود پارک میں آنا بھی چھوڑ دیا ہے۔ ان کا کہنا ہے کہ پہلے بچے رات گئے تک یہاں اس پارک میں کھیلتے تھے اور اب دن کے وقت بھی کوئی نظر نہیں آتا۔

میریٹ ہوٹل میں دھماکے کے باعث گلشن جناح کالونی میں موجود ان فلیٹس میں ہونے والا مالی نقصان یقیناً شدید ہے مگر یہاں رہنے والے بچوں کی حالت دیکھ کر اندازہ ہوتا ہے کہ ان بچوں کے کانوں میں سے اس دھماکے کی آواز اور ذہنوں سے اپنے ٹوٹے ہوئے گھروں کی تصویر جاتے جاتے ہی جائے گی۔