علی سلمان بی بی سی اردو ڈاٹ کام لاہور

	مسلم لیگ نون کے وفاقی وزراء کے استعفے منظور کرنے کا ابھی فیصلہ نہیں کیا: گیلانی

یہ بات انہوں نے اپنی لاہور آمد کے بعد پرانے ائر پورٹ کے وی آئی پی لاؤنج میں میڈیا سے گفتگو کرتے ہوئے کہی۔

وزیر اعظم یوسف رضا گیلانی نے کہا کہ ان کی پارٹی نے مسلم لیگ نون کے وفاقی وزراء کے استعفے منظور کرنے کا ابھی فیصلہ نہیں کیا۔

جب ان سےسوال کیا گیا کہ مسلم لیگ نون سے ان کے اتحاد کی اب کیا پوزیشن ہے تو انہوں نے کوئی واضح جواب دینے کی بجائے کہا کہ سیاست ڈے ٹو ڈے افئیر ہے۔ انہوں نے کہا کہ ان کی پارٹی نے مخلوط حکومت قائم کرنے کا فیصلہ کیا تھا اور وہ اس فیصلے پر قائم ہے۔

وزیر اعظم نے قومی احتساب بیورو میں شریف برداران کے خلاف مقدمات کی سماعت شروع کیے جانے سے متعلق ایک سوال کے جواب میں کہا کہ ’نیب کی کوئی حثیت نہیں ہے۔‘

وزیر اعظم نے کہا کہ صدر بننے کے بعد آصف زرداری پارٹی کے شریک چیئرمین کا عہدہ رکھیں گے یا چھوڑ دیں گے اس کا فیصلہ جماعت کی سینٹرل ایگزیکٹو کمیٹی کرے گی البتہ انہو ں نے کہا کہ صدر وفاق کی علامت ہوتا ہے اور اسے غیر جانبدار ہونا چاہیے۔

انہوں نے کہا کہ صدر کے اسمبلی توڑنے کے اختیار اٹھاون ٹو بی اور سترہویں ترمیم کو ان کی پارٹی نے نہ پہلے مانا تھا اور نہ ہی اب مانتی ہے۔ ان کا خاتمہ پارٹی کے منشور کا حصہ ہے۔ اس منشور پر عملدرآمد کیاجائے گا اور ایوان صدر اور پارلیمان کے درمیان طاقت کا توازن پیدا کیا جائے گا۔

لاہور ائر پورٹ پر وزیر اعظم کا استقبال کرنے کے لیے وزیراعلٰی پنجاب شہباز شریف،گورنر پنجاب سلمان تاثیر، سینئیر وزیر راجہ ریاض اور پیپلز پارٹی کے دیگر اراکین موجود تھے۔