نثار کھوکھر بی بی سی اردو ڈاٹ کام، سکھر

	یہ ایوارڈ دسمبر دو ہزار آٹھ میں نیویارک میں دیا جائے گا

تنظیم نے سفارش کی ہے کہ اعتزاز کی پاکستان میں آزاد عدلیہ اور انسانی حقوق کے لیے کی گئی جدوجہد کو مدنظر رکھتے ہوئے اس سال یہ ایوارڈ انہیں دیا جائے۔

پاکستان سپریم کورٹ بار کونسل کے چیئرمین اعتزاز احسن کی نامزدگی کی حمایت کرنے والوں میں پاکستانی معزول چیف جسٹس افتخار محمد چودھری، اقوام متحدہ کے سیکریٹری جنرل کی سابق نمائندہ خصوصی برائے انسانی حقوق حنا جیلانی سمیت کینیڈا اور ہالینڈ کی وکیل اور انسانی حقوق کی تنظیمیں شامل ہیں ۔

خیا ل رہے کہ اقوام متحدہ کا ایوارڈ برائے انسانی حقوق ہر پانچ سال بعد ایسی شخصیات اور تنظیموں کو دیا جاتا ہے جن کی انسانی حقوق کے حوالے سے خدمات قابل قدر ہوں ۔

یہ ایورڈ پہلی مرتبہ انیس سو اڑسٹھ میں دیا گیا تھا۔ ماضی میں یہ ایوارڈ حاصل کرنے والوں میں نیلسن منڈیلا، سابق امریکی صدر جمی کارٹر، مارٹن لوتھر کنگ جیسی شحصیات شامل ہیں۔

انسانی حقوق کی ایشیائی تنظیم نے اقوام متحدہ کو روانہ کردہ درخواست میں کہا ہے کہ اعتزاز احسن نہ صرف پاکستان سپریم کورٹ بار کے صدر اور معزول چیف جسٹس کے وکیل ہیں مگر انہوں نے پاکستان میں ایک ایسی تحریک شروع کر رکھی ہے جس کی کامیابی سے پاکستان میں قانون کی حکمرانی اور انسانی حقوق کے احترام کے لیے راستہ ہموار ہوسکے گا۔

انسانی حقوق کا یہ ایوارڈ دسمبر دو ہزار آٹھ میں نیویارک میں اقوام متحدہ کے صدر دفاتر میں ایک تقریب میں دیا جائیگا۔