شہزاد ملک بی بی سی اردو ڈاٹ کام، اسلام آباد

	پیٹرول کی قیمتوں میں حالیہ اضافے سے ایک دن قبل ملک کے مختلف شہروں پیٹرول پمپس پر فروخت روک دی گئی تھی

اسلام آباد ہائی کورٹ میں پاکستان پیپلز موومنٹ کے صدر اشفاق چوہدری کی جانب سے دائر اس درخواست میں آئل اینڈ گیس ریگولیٹری اتھارٹی، وزارت پیٹرولیم اور سی این جی ڈیلر ایسوسی ایشن کو فریق بنایا گیا ہے۔

منگل کے روز اس درخواست کی سماعت کے دوران درخواست گزار کے وکیل فرید اقبال خٹک نے دلائل دیتے ہوئے کہا کہ عالمی مارکیٹ میں تیل کی قیمت کم ہوئی ہے لیکن اس کے باوجود پاکستان میں تیل کی قمیت میں اضافہ کردیا گیا ہے۔ جس کی وجہ سے مہنگائی میں اضافہ ہوا ہے اور حتی کہ کھانے پینے کی اشیاء کی قیمتیں بھی عام آدمی کی پہنچ سے باہر ہیں۔

انہوں نے کہا کہ مختلف شہروں میں سی این جی سٹیشن پر گیس حکومت کے مقرر کردہ ریٹس سے زیادہ قیمت پر فروخت کی جا رہی ہے اور اس کا بوجھ صارفین پر پڑ رہا ہے۔

درخواست گزار کے وکیل فرید اقبال خٹک نے عدالت سے استدعا کی کہ فریقین کو اس بات کا پابند بنایا جائے کہ وہ تیل اور گیس کی قیمتوں میں حالیہ اضافے کو واپس لے تاکہ صارفین کو تھوڑا سا ریلیف مل سکے۔

واضح رہے کہ گزشتہ چار ماہ کے دوران پیٹرول کی قیمت میں تیس روپے سے زائد کا اضافہ کیا گیا ہے اور اتوار کے روز ہونے والے حالیہ اضافے کے خلاف عوام اور بلخصوص ٹرانسپورٹرز سراپہ احتجاج بنے ہوئے ہیں اور وہ حکومت سے اس اضافے میں واپسی کا مُطالبہ کر رہے ہیں جبکہ اس ضمن میں حکومت کا کہنا ہے کہ وہ پیٹرولیم کی مصنوعات پر ایک ارب سے زائد کی سبسڈی دے رہی ہے۔

اس درخواست کی سماعت کرنے والے جج جسٹس منیر پراچہ نے فریقین کو نوٹس جاری کرتے ہوئے اس کی سماعت چوبیس ستمبر تک ملتوی کردی ہے۔

واضع رہے کہ اس سے قبل بھی پیٹرولیم کی قیمتوں میں حالیہ اضافے کے خلاف اسلام آباد ہائی کورٹ میں درخواست دائر کی گئی تھی جن کو یہ کہہ کی نمٹا دیا گیا کہ منگائی اور مختلف اشیاء کی قیمتوں میں اضافے کے خلاف ایک جیسی درخواستیں سپریم کورٹ میں زیر سماعت ہیں۔