بیورو رپورٹ بی بی سی اردو ڈاٹ کام، اسلام آباد

	شاہ محمود قرشی اپنی امریکی ہم منصب کونڈالیزا رائس سے بھی ملیں گے

پیپلز پارٹی کی حکومت نےگزشتہ برس ستائیس دسمبر کو محترمہ بینظیر بھٹو کی راولپنڈی کی ایک انتخابی ریلی میں ہلاکت کے بعد اس کی تحقیقات اقوام متحدہ سے کروانے کا اعلان کیا تھا۔

حکومت میں آنے کے بعد پیپلز پارٹی نے قومی اسمبلی سے اقوام متحدہ کے ذریعے اس قتل کی تحقیقات سے متعلق ایک قرار داد منظور بھی کروائی تھی۔

سرکاری ذرائع کے مطابق وزیر خارجہ دس جولائی کو اقوام متحدہ کے سیکرٹری جنرل بان کی مون سے ملاقات میں درخواست پر پیش رفت پر بات کریں گے۔ شاہ محمود قریشی تحقیقات کے سلسلے میں راہ ہموار کرنے کی غرض سے سلامتی کونسل کے اراکین ممالک کے نمائندوں سے بھی ملیں گے۔

اس کے علاوہ وہ سلامتی کونسل کے افغانستان سے متعلق ایک اجلاس سے خطاب بھی کریں گے۔ پاکستانی وزیرِ خارجہ گیارہ جولائی کو واشنگٹن کا ایک روزہ دورہ کریں گے جس میں وہ اپنی امریکی ہم منصب کونڈالیزا رائس، اراکین کانگرس، سینئر امریکی اہلکاروں اور پاکستانی برادری سے ملاقاتیں کریں گے۔