شہزاد ملک بی بی سی اردو ڈاٹ کام، اسلام آباد

	چیف جسٹس نے یہ از خود نوٹس مختلف اخبارات میں اس حوالے سے شائع ہونے والی خبروں پر لیا ہے

سپریم کورٹ کے ڈپٹی رجسٹرار جوڈیشل بشیر جنجوعہ نے اس کی تصدیق کرتے ہوئے کہا ہے کہ چیف جسٹس نے یہ از خود نوٹس مختلف اخبارات میں اس حوالے سے شائع ہونے والی خبروں پر لیا ہے۔

انہوں نے کہا کہ وفاق کو اس حوالے سے کہا گیا ہے کہ وہ ایک ہفتے کے اندر اندر اس کا جواب عدالت کو دے جب کہ اس از خود نوٹس کی باقائدہ سماعت چودہ جولائی سے شروع ہوگی۔

واضح رہے کہ چند روز قبل کراچی میں ہونے والے وفاقی کابینہ کے اجلاس میں یہ فیصلہ کیا گیا تھا کہ موت کی سزا پانے والے قیدیوں کی سزائیں عمر قید میں تبدیل کر دی جائیں۔

مقامی میڈیا میں اس حوالے سے جو خبریں شائع ہوئیں تھیں اُس میں کہا گیا تھا کہ اس وقت ملک میں سات ہزار کے قریب ایسے قیدی ہیں جن کو مختلف عدالتوں کی طرف سے سزائے موت سنائی جاچکی ہے جبکہ اس سزا کو تبدیل کرنے کے حوالے سے وزارت قانون نے تحفظات کا اظہار کیا تھا۔

اس سے قبل وزیر اعظم سید یوسف رضا گیلانی نے قومی اسمبلی میں خطاب کے دوران پاکستان پیپلز پارٹی کی چیئرپرسن مرحومہ بےنظیر بھٹو کی سالگرہ کے موقع پر اُنہیں خراج تحسین پیش کرتے ہوئے سزائے موت پانے والے قیدیوں کی سزا کو عمر قید میں تبدیل کرنے کا اعلان کیا تھا۔