عبدالحئی کاکڑ بی بی سی اردوڈاٹ کام، پشاور

	سوات میں صوبائی حکومت نے طالبان سے معاہدہ کیا تھا

سوات میں فوج کے شعبہ تعلقات عامہ کے ترجمان کرنل ندیم نے بی بی سی کو بتایا کہ منگل کی صبح سات بجے تحصیل مٹہ میں سمبٹ کے مقام پر سکیورٹی فورسز کے ایک قافلے پر مسلح افراد نے فائرنگ کی۔ ان کے بقول جوابی فائرنگ میں ایک شخص ہلاک جبکہ ایک زخمی ہوگیا ہے۔

انہوں نے مزید بتایا کہ فریقین کے درمیان دو گھنٹے تک فائرنگ جاری رہی تاہم بقول ا ن کے اس واقعہ میں سکیوٹی فورسز کو کسی قسم کا جانی نقصان نہیں ہوا۔ ان کے مطابق سکیورٹی فورسز کے اہلکار معمول کے گشت پر تھے جب ان پر حملہ کیا گیا۔

سوات میں طالبان ترجمان مسلم خان نے اپنے دو ساتھیوں کی ہلاکت اور دو کے زخمی ہونے کی تصدیق کرتےہوئے الزام لگایا کہ امن معاہدے کے باوجود منگل کی صبح سکیورٹی فورسز نے پہاڑوں میں چھپے طالبان کا محاصرہ کیا جبکہ طالبان نے اپنے’دفاع‘ میں ان پرفائرنگ کردی۔

مسلم خان کا کہنا تھا کہ مسلح طالبان اپنے گھروں کو چھوڑ کر پہاڑوں پر چلے گئے ہیں مگر وہاں پر بھی انہیں چین سے بیٹھنے نہیں دیا جارہا ہے۔ ان کے بقول سکیورٹی فورسز نے یہ مبینہ کارروائی ایک ایسے وقت کی ہے جب صوبائی حکومت اور طالبان کے درمیان ہونے والے امن مذاکرات میں تعطل پیدا ہونے کے بعد آئندہ کا لائحہ عمل طے کرنے کے لیے طالبان کی سو رکنی شوریٰ کا تین روزہ اجلاس مولانا فضل اللہ کی سربراہی میں جاری ہے۔