دلاور خان وزیر بی بی سی اردو ڈاٹ کام ڈیرہ اسماعیل خان

	سکیورٹی فورسز کو اس علاقے میں طالبان مزاحمت کا سامنا ہے

مقامی انتظامیہ سے ملنے والی اطلاعات کے مطابق سنیچر کو شمالی وزیرستان کے صدر مقام میرانشاہ سے پچیس کلومیٹر دور شمال کی جانب سپین وام میں مقامی لوگوں کو ایک لاش ملی۔ لاش کے ساتھ ہی پشتو زبان میں ایک خط بھی پڑا تھا جس میں الزام لگایا گیاتھا کہ مقتول امریکہ کے لیے جاسوسی کرتا تھا۔

خط میں خبر دار کیا گیا ہے کہ امریکہ کے لیے جاسوسی کرنے والوں کا انجام یہی ہوگا۔ خط میں اس شخص کا نام گل پایو خان اور اس کا تعلق افغانستان کے صوبہ خوست کے علاقے کرم باغ سے بتایا گیا ہے۔

شمالی وزیرستان کے مقامی لوگوں نے بی بی سی کو بتایا کہ گل پایو خان کو چند دن پہلے نامعلوم نقاب پوشوں نے خوست کے علاقے سے اغواء کیا تھا۔ انہوں نے بتایا کہ گل پایو خان کو پھانسی دیکر قتل کیاگیا تھا۔

مقامی انتظامیہ کے مطابق لاش کو خاصہ دار فورس کے اہلکاروں نے ان کے قریبی رشتہ دار سعادت خان کے حوالے کر دیا گیا جس کے بعد لاش کو افغانستان روانہ کر دیا گیا ہے۔

یاد رہے کہ گزشتہ چار برسوں کے دوران درجنوں افراد کو امریکہ کے لیے جاسوسی کے الزام میں قتل کیا جاچکا ہے۔ان وارداتوں کا الزام علاقے میں سرگرم مبینہ شدت پسندوں پر لگایا جاتا ہے۔

اس واقعہ سے ایک ہفتہ پہلے ایک مقامی شخص کو امریکہ کے لیے جاسوسی کے الزام میں ہلاک کیا گیا تھا۔