عبدالحئی کاکڑ بی بی سی اردو ڈاٹ کام، پشاور

	انتخابات کے بعد تحریک طالبان کی جانب سے جنگ بندی کے اعلان کے بعد سوات میں بھی پر تشدد واقعات میں کافی حد تک کمی آئی تھی

سوات پولیس کا کہنا ہے کہ پہلا واقعہ بدھ اور جمعرات کی درمیانی شب کو اس وقت پیش آیا جب تحصیل کبل کے پولیس اسٹیشن اور گالف کورس پر بعض نامعلوم مسلح افراد نے راکٹوں سے حملہ کردیا جس کے نتیجے میں ایک سکیورٹی اہلکار ہلاک جبکہ ایک شدید زخمی ہوگیا ہے۔

حکام کے بقول اس واقعہ کے بعد سکیورٹی فورسز اور مسلح افراد کے درمیان ایک گھنٹے تک شدید فائرنگ کا تبادلہ ہوا جس کے بعد مسلح افراد فرار ہونے میں کامیاب ہوگئے تاہم فائرنگ کے دوران فریقین کو کسی قسم کا کوئی جانی نقصان نہیں پہنچا ہے۔

انتخابات کے بعد تحریک طالبان کی جانب سے جنگ بندی کے اعلان کے بعد شورش زدہ علاقے سوات میں بھی پر تشدد واقعات میں کافی حد تک کمی آئی تھی مگر حکومت اور طالبان کے درمیان ہونے والے مذاکرات کے مبینہ خاتمے کے بعد قبائلی علاقوں کی طرح سوات میں بھی گزشتہ چند دنوں سے پرتشدد واقعات میں اضافہ دیکھنے میں آیا ہے۔

دوسری طرف پولیس کا کہنا ہے کہ جمعرات کی صبح نامعلوم افراد نے یونین کونسل کیشورہ کے ناظم یوسف خان کے بھائی کو اغواء کیا ہے جبکہ ایک دوسرے واقعہ میں مسلح افراد نے یونین کونسل توتانو بانڈہ کے ناظم سیف اللہ کے بھائی پر قاتلانہ حملہ کیا جس میں وہ محفوظ رہے ہیں۔

شورش زدہ سوات میں گزشتہ چند روز کے دوران پر تشدد واقعات میں اضافہ دیکھنے میں آیا ہے۔ بدھ کو بھی نامعلوم مسلح نقاب پوشوں نے لڑکیوں کے ایک سکول کو آگ لگائی تھی جس سے سکول کی عمارت تباہ ہوگئی تھی جبکہ چار دن قبل بھی چہار باغ میں بھی لڑکیوں کے ایک ہائی سکول کو نامعلوم مسلح افراد نے نذر آتش کردیا تھا ۔

ان تمام واقعات میں مبینہ طور ملوث کسی بھی شخص کو تاحال گرفتار نہیں کیا جاسکاہے اور نہ ہی انتظامیہ نے کسی کو ذمہ دار ٹھرایا ہے۔

اٹھارہ فروری کے انتخابات کے بعد تحریک طالبان کی جانب سے جنگ بندی کے اعلان کے بعد شورش زدہ علاقے سوات میں بھی پر تشدد واقعات میں کافی حد تک کمی آئی تھی مگر حکومت اور طالبان کے درمیان ہونے والے مذاکرات کے مبینہ خاتمے کے بعد قبائلی علاقوں اور صوبہ سرحد کے جنوبی اضلاع کی طرح سوات میں بھی گزشتہ چند دنوں سے پرتشدد واقعات میں اضافہ دیکھنے میں آیا ہے۔