عبادالحق بی بی سی اردو ڈاٹ کام،لاہور

	پریس کانفرنس میں مسلم لیگ قاف کے سیکرٹری جنرل مشاہد حسین بھی موجود تھے

اتوار کو اپنی رہائش گاہ پر پریس کانفرنس سے خطاب کرتے ہوئے انہوں نے کہا کہ ججوں کی بحالی کا معاملہ کوئی آئینی یا قانونی معاملہ نہیں بلکہ یہ ایک سیاسی مسئلہ بن چکا ہے۔ان کا کہنا ہے کہ عدلیہ کے بحران کو حل کیا جائے تاکہ دیگر مسائل کی طرف توجہ دی جاسکے۔

پریس کانفرنس کے دوران مسلم لیگ قاف کے سیکرٹری جنرل سید مشاہد حسین بھی موجود تھے۔

چودھری شجاعت حسین کا کہنا ہے کہ جن ججوں نے پی سی او کے تحت حلف اٹھایا تھا وہ اپنے عہدوں پر برقرار رہیں گے۔ ان کے بقول ان ججوں کو فارغ کرنے کا سوال پیدا نہیں ہوتا۔

صدر کے اسمبلی تحلیل کرنے کے آئینی اختیار کے اٹھاون ٹوبی کو ختم کرنے کی حمایت کے بارے میں سوال پر انہوں نے کہا کہ جب اس آئینی اختیار کے خاتمے کی بات ہوگی تو اس وقت اس بارے میں فیصلہ کریں گے تاہم ان کی رائے میں اٹھاون ٹو بی کو صدر پرویز مشرف کے ساتھ منسلک نہیں کرنا چاہئے۔

نہ پہلے ٹھیک جمہوریت تھی اور نہ اب ٹھیک جمہوریت ہے۔ جہاں اصل معنوں میں جمہوریت ہوگی وہاں اٹھاون ٹو بی نہیں ہونی چاہئے چودھری شجاعت حسین

مسلم لیگ قاف کے سربراہ کا کہنا ہے کہ ان کی جماعت میں کوئی فاروڈ بلاک نہیں ہے اور اس حوالے سے باتیں غلط ہیں۔

چودھری شجاعت حسین کا کہنا ہے کہ نہ پہلے ٹھیک جمہوریت تھی اور نہ اب ٹھیک جمہوریت ہے۔ ان کا کہنا ہے کہ جہاں اصل معنوں میں جمہوریت ہوگی وہاں اٹھاون ٹو بی نہیں ہونی چاہئے۔

چودھری شجاعت حسن نے کہا کہ بلوچستان کے معاملہ پر قائم ہونے والی کمیٹی نے جو سفارشات مرتب کیں تھیں ان پر عمل درآمد ہونا چاہیے۔ بلوچستان کے حوالے سے سوال پر سید مشاہد حسین نے کہا کہ وفاق کے ایشوز کا حل ڈنڈا نہیں بلکہ مذاکرات ہیں۔

چودھری شجاعت حسین کا کہنا ہے کہ ایک ماہ کےدوران جتنی مہنگائی ہوئی ہے اتنی مہنگائی گزشتہ پانچ برسوں میں نہیں ہوئی۔انہوں نے مزید کہا کہ ایک ماہ میں معلوم ہوجائے گا کہ اس مہنگائی کا ذمہ دار کون ہے۔

اس موقع پر مسلم لیگ قاف کے سیکرٹری جنرل سید مشاہدہ حسین نے سیکرٹری خارجہ ریاض محمد خان کو ان کے عہدے سے ہٹانے کی شدید مذمت کی اور کہا کہ جس طرح صدر مشرف نے چیف جسٹس افتخار محمد چودھری کو ہٹاکر غلطی کی تھی اس طرح اب موجودہ سیکرٹری خارجہ کو ان عہدے سے ہٹاکر غلط کیا ہے۔

پاکستان دیوالیہ نہیں ہورہا ہے تاہم وزیر خزانہ کو اصل حقائق سے قوم کو آگاہ کرنا چاہئے مشاہد حسین

اس موقع پر ایک سوال پر چودھری شجاعت حسین نے وضاحت کی کہ قومی اسمبلی میں قائد حزب مخالف پرویز الہیْ نے بینظیر بھٹو کے قتل کی تحقیقات اقوام متحدہ سے کرانے کی اس لیے مخالفت نہیں کی کیونکہ ان کے بقول پھر یہ کہا جاناتھا کہ پرویزالہیْ ذاتی وجوہات کی بنا پر اس کی مخالفت کررہے ہیں۔

سید مشاہد حسین نےمطالبہ کیا کہ حکمران اتحاد اپنے وعدوں کو پورا کرے یا پھر قوم سے معذرت کرلیں۔ایک سوال پر ان کا کہنا ہے کہ پاکستان دیوالیہ نہیں ہورہا ہے تاہم وزیر خزانہ کو اصل حقائق سے قوم کو آگاہ کرنا چاہئے۔