ریاض سہیل بی بی سی اردو ڈاٹ کام، کراچی

	نثار کھوڑو کا تعلق بینظیر بھٹو کے ضلعہ لاڑکانہ سے ہے

نثار کھوڑو خاندانی طور پر سیاسی پس منظر رکھتے ہیں اور ان کے چچا ایوب کھوڑو سندھ کے وزیراعلیٰ بھی رہ چکے ہیں ۔

نثار کھوڑو کا تعلق بینظیر بھٹو کے ضلع لاڑکانہ سے ہے، وہ بائیس ستمبر انیس سو پچاس کو لاڑکانہ کے قریبی علاقے عاقل شاہ میں پیدا ہوئے۔ ان کی پیدائش سے دو ماہ قبل ان کے والد محمد نواز کھوڑو انتقال کرگئے اور ان کے چچا ایوب کھوڑو نے ان کی پرورش کی۔

نثار کھوڑو نے ابتدائی تعلیم پائلٹ سکول لاڑکانہ سے حاصل کی اور اعلیٰ تعلیم (ماسٹرز کی ڈگری) جامعہ کراچی سے مکمل کی۔

انہوں نے سیاسی سفر کی ابتدا اصغر خان کی جماعت تحریک استقلال سے کی، اور اسی لیے مخالفین ذوالفقار علی بھٹو کی پھانسی کے معاملے پر انہیں تنقید کا نشانہ بناتے رہے ہیں۔ انیس سو ستاسی میں وہ پیپلز پارٹی میں شامل ہوگئے۔

انیس سو نوے میں انہیں پیپلز پارٹی لاڑکانہ کا صدر منتخب کیا گیا اور اسی سال انہیں سندھ اسمبلی میں ڈپٹی اپوزیشن رہنما بھی نامزد کر دیا گیا۔ تین سال کے بعد انیس سو ترانوے میں وہ پارٹی کے صوبائی نائب صدر مقرر کیے گئے۔

پیپلز پارٹی کے حلقوں میں نثار کھوڑو کا شمار ذہین اور مدلل گفتگو کرنے والوں میں ہوتا ہے۔ انہیں انیس سو ستانوے میں پارٹی کا صوبائی صدر مقرر کیا گیا اور سن دو ہزار دو میں وجود میں آنے والی اسمبلی میں انہیں قائد حزب اختلاف منتخب کیا گیا۔

سخت سیاسی مشکلات کے دور میں انہوں نے بھرپور انداز سے اپنا کردار ادا کیا، اور وہ ایم ایم اے کو بھی ساتھ لے کر چلے۔

نثار کھوڑو پیشے کے لحاظ سے زمیندار ہیں۔ پیپلز پارٹی کی انیس سو ترانوے اور ستانوے کے حکومتی ادوار میں انہیں صوبائی وزیر مقرر کیا گیا تھا۔وہ چھ مرتبہ صوبائی اسمبلی کے رکن منتخب ہوچکے ہیں۔

ان کی کوششوں سے سندھ میں اینٹی تھل کینال ایکشن کمیٹی قائم ہوئی، جس میں پیپلز پارٹی اور قوم پرست جماعتوں کے ساتھ جمعیت علمائے اسلام اور عوامی نیشنل پارٹی بھی شامل تھی جس نے پورے صوبے میں جلسے منعقد کیے۔

نثار کھوڑو سندھ میں وزرات اعلیٰ کی دوڑ میں بھی شامل رہے مگر بعد میں انہیں پارٹی نے سپیکر کے لیے نامزد کیا۔