دلاور خان وزیر بی بی سی اردو ڈاٹ کام، ڈیرہ اسماعیل خان

	ایف سی آر کے تحت حکومت کسی ایک شخص یا چند افراد پر دباؤ ڈالنے کے لئے پورے قبیلے کوسزا دے سکتی ہے

فرنٹیر کرائمز ریگولیشن کی ابتداء اس وقت ہوئی جب برطانیہ نے اٹھارہ سو اڑتالیس میں سرحدی پختون آبادی والے کچھ علاقوں پر قبضہ کیا۔جس کے بعد اس میں دو مرتبہ تبدیلیاں لائی گئیں۔لیکن انیس سوایک کے بعد سے اس میں کوئی ترمیم نہیں کی گئی۔

پاکستان کے قیام کے بعد فرنٹیر کرائمز ریگولیشن صوبہ سرحد، بلوچستان اور تمام قبائلی علاقوں میں موجود تھا۔صوبہ سرحد میں انیس سوچھپن کے آئین کے نفاذ کے بعد اسے ختم کردیا گیا جبکہ باقی ماندہ علاقوں میں اس وقت ختم ہوا جب بلوچستان ہائی کورٹ نے ’ قران ،سنت بمقابلہ ایف سی آر، کیس میں اس کوغیر اسلامی قرار دیا۔صوبہ سرحد کے زیر انتظام قبائلی علاقوں میں یہ انیس پچھتر میں ختم ہوا۔

شرعی نظام  قبائلی علاقوں میں ایف سی آر ختم کرنے کے بعد شرعی نظام نافذ کیا جائے کیونکہ قبائلی علاقوں میں شریعت کا نظام لوگوں کے مزاج کے مطابق ہے۔اور اگر ترمیم کرنا بھی ہے تواس میں پولیٹکل ایجنٹ کے اختیارات کو محدود کرنا چاہیے سینیٹر صالح شاہ

جنوبی وزیرستان سے سینیٹر صالح شاہ کا کہنا ہے کہ ’ قبائلی علاقوں میں ایف سی آر ختم کرنے کے بعد شرعی نظام نافذ کیا جائے۔، ان کےمطابق قبائلی علاقوں میں شریعت کا نظام لوگوں کے مزاج کے مطابق ہے۔انہوں نے کہا کہ اگر ترمیم کرنا بھی ہے تواس میں پولیٹکل ایجنٹ کے اختیارات کو محدود کرنا چاہیے۔،

لیکن کچھ دوسرے قبائلی اس کو ایک ظالمانہ نظام سمجھتے ہیں۔وہ کہتے ہیں کہ اس کو سرے سے ختم کرنا چاہیے۔ جنوبی وزیرستان سے تعلق رکھنے والے اور سماجی شخصیت کے حامل حاجی محمد کا کہنا ہے کہ ملک کے دوسرے علاقوں کے لیے جمہوریت فائدہ مند ہے تو قبائلی علاقوں کےلیے اس کو کیوں نہیں پسند کیا جاتا۔

انہوں نے مزید کہا کہ ’قبائلی علاقوں میں ملک نے اجارہ داری قائم کی ہے تمام سرکاری مراعات بھی وہ کھاتے ہیں۔یہ سلسلہ نسل در نسل چلا آرہا ہے۔،

انہوں نے قبائلی علاقوں میں شریعت کے نفاذ کی مخالفت کرتے ہوئے کہا کہ ’اس سے ایک اور مسئلہ کھڑا ہوجائےگا جبکہ قبائلی علاقوں میں ابتر صورتحال کی وجہ بھی ایف سی آر جیسے فرسودہ نظام کی موجودگی ہے۔،

شمالی وزیرستان کے قیصر اقبال نے کہا ہے کہ اس فرسودہ نظام کو سرے سے ختم کرنا چاہیے کیوں کہ اگر پورےگاؤں میں کوئی معمولی سا جرم بھی کرلے تو پولیٹکل انتظامیہ گاؤں کےکسی بھی فرد کو گرفتار کرکے جیل میں ڈال دیتی ہیں۔پھر کئی سال تک وہ جیل میں ہی پڑا رہتا ہے اور پولیٹکل ایجنٹ کےاس فیصلے کے خلاف عدالت میں بھی نہیں جاسکتے ہیں۔،

ایف سی آر میں سب سے زیادہ متنازعہ دفعہ چالیس ایف سی آر ہے۔ اس دفعہ کی بنا پر ’اجتماعی ذمہ داری‘ کے تحت پولیٹکل انتظامیہ کسی ایک شخص پر شک کی وجہ سے پورے گاؤں، گاؤں کے کسی بھی شخص یا اس کے پورے گھرانے کوگرفتار کرسکتی ہے۔

ایف سی آر کا خاتمہ یا اصلاح ایک مشکل کام ہے۔دیکھنا یہ ہے کہ نئی حکومت اپنے پہلے سو دن میں یہ کرپائے گی یا نہیں۔