وسعت اللہ خان بی بی سی اردو ڈاٹ کام، اسلام آباد

’تقریبِ حلفِ وفاداری میں وہ لوگ بھی نہیں آئے جو آٹھ برس تک صدر پرویز مشرف کا سایہ بنے رہے‘

آج بیس برس بعد بھی وہی وسیع و عریض ہال تھا جس میں انہی دو فانوسوں کی روشنی میں حکومتِ پاکستان کے سرکاری نشان والے سبز میز پوش پر اسی طرح پھول سجے ہوئے تھے اور حلف اٹھانے اور اٹھوانے والے کے پیچھے سجاوٹی فوجی لباس میں دو انسانی بت بھی ساکت کھڑے تھے۔ سلیقے سے قطار در قطار لگی کرسیاں بھی بھری ہوئی تھیں۔

لیکن بلاول بھٹو زرداری، آصف زرداری، نواز شریف اور اسفند یار ولی نے یوسف رضا گیلانی کو رحمان ملک، فاروق نائیک، جہانگیر بدر، بابر اعوان، لطیف کھوسہ اور ڈاکٹر قیوم کے ساتھ ایوانِ صدر ایسے بھیجا جیسے لڑکی والے رخصتی کے وقت دو چار جہاندیدہ بوڑھیاں بطور مشیر دلہن کے ساتھ کر دیتے ہیں۔

حیرت تو اس پر ہے کہ تقریبِ حلفِ وفاداری میں وہ لوگ بھی نہیں آئے جو آٹھ برس تک صدر پرویز مشرف کا سایہ بنے رہے اور جن کی وفاداری کا یہ عالم تھا کہ بقول ضمیر جعفری ’آقا جو لڑکھڑایا تو نوکر پھسل گیا۔‘

صدر مملکت آخری وقت تک عینک کے پیچھے سے چوہدری شجاعت، پرویز الہی، مشاہد حسین اور ہمنواؤں کو تلاش کرتے رہے اور صدر کے چہرے پر ایک کش مکش آمیز سنجیدگی طاری رہی۔

گو ہال میں نگراں وزیرِ اعظم، ان کی کابینہ، صدارتی عملہ، غیر ملکی سفرا سب ہی طرح کے لوگ تھے۔ لیکن اسٹیبلشمنٹ کے ناپسندیدہ چند لوگوں کی موجودگی کے سبب تقریباتی ماحول کچھ ایسا ہو گیا تھا جیسے کسی ٹرین کے ڈبے یا بس میں ایک ساتھ سفر کرنے پر مجبور مسافر ایک دوسرے کو اخلاقاً برداشت کر لیتے ہیں۔

صدر کی سنجیدگی  صدر مملکت آخری وقت تک عینک کے پیچھے سے چوہدری شجاعت، پرویز الہی، مشاہد حسین اور ہمنواؤں کو تلاش کرتے رہے اور صدر کے چہرے پر ایک کش مکش آمیز سنجیدگی طاری رہی

حلف برداری کے بعد صدر نے جس طرح ایک لمحہ سوچنے کے بعد نئے وزیرِ اعظم سے مصاحفہ کیا مجھے بےساختہ کٹھمنڈو میں ہونے والی وہ سارک سربراہ کانفرنس یاد آگئی جب پرویز مشرف نے اٹل بہاری واجپائی کے پاس جا کر مصاحفے کے لیے ہاتھ بڑھایا تو واجپائی کو بھی ایک برفانی مسکراہٹ کے ساتھ بادلِ نخواستہ ہاتھ بڑھانا ہی پڑ گیا۔

ماحول کی سرد مہری میں اگر کوئی کسر رہ گئی تھی تو وہ حلف کے الفاظ ختم ہوتے ہی تقریب کے ادب و آداب سے عاری کچھ لوگوں کی جانب سے بلند ہونے والے ’جئے بھٹو‘ اور ’چاروں صوبوں کی زنجیر بے نظیر‘ کے نعرے نے پوری کر دی۔

صدر پرویز مشرف نے اس موقع پر اگلی نشست پر بحریہ اور فضائیہ کے سربراہوں کے ساتھ بیٹھے ہوئے جنرل اشفاق پرویز کیانی کی جانب دیکھا۔ لیکن جنرل کیانی سوائے چیف آف آرمی سٹاف کی چھڑی ہلکے سے ہلانے کے علاوہ کچھ نہ کر پائے۔

بالشویکوں کے ہاتھوں روس کے آخری مطلق العنان زار نکولس دوم کی موت اگرچہ سرخ انقلاب کے ایک برس بعد ہوئی، لیکن مورخین کہتے ہیں کہ زار کا انتقال اصل میں اسی دن ہوگیا تھا جب انقلاب کا طبل بجتے ہی زار نے دیکھا کہ بدتمیز مزدور اور کسان شاہی محل میں زبردستی گھسنے کے بعد قالین پر کیچڑ بھرے جوتوں کے ساتھ چل رہے ہیں۔