احمدرضا بی بی سی اردو ڈاٹ کام، اسلام آباد

	بلاول بھٹو زرداری بدھ کے روز کراچی پہنچے

انہوں نے یہ بات بدھ کو یہاں جاری کردہ ایک بیان میں کہی، تاہم انہوں نے یہ نہیں بتایا کہ وزارت عظمی کے امیدوار کا اعلان کس دن ہوگا۔

بلاول بھٹو زرداری بہرحال اس سلسلے میں بدھ کو لندن سے کراچی پہنچ گئے ہیں۔

فرحت اللہ بابر نے کہا کہ ’بلاول بھٹو زرداری صحیح وقت پر وزارت عظمی کے امیدوار کے نام کا اعلان کریں گے۔‘

تاہم انہوں نے کہا کہ وزیر اعظم کے عہدے کے امیدوار کا اعلان اس وقت کیا جائے گا جب صدر مملکت وزیر اعظم کے امیدوار کے انتخاب کے لیے قومی اسمبلی کا آئندہ اجلاس بلائیں گے۔

واضح رہے کہ وزارت عظمی کے لیے پارٹی کے امیدوار کے نام کا اعلان کرنے کی ذمہ داری بلاول بھٹو زرداری کو ایک ایسے موقع پر سونپی گئی ہے جب یہ خبریں گرم ہیں کہ وزیر اعظم کے عہدے پر نامزدگی کے معاملے پر پارٹی کے شریک چیئرمین آصف زرداری اور وائس چئرمین مخدوم امین فہیم کے مابین اختلافات پائے جاتے ہیں۔

مبصرین کا کہنا ہے کہ آصف زرداری کی جانب سے یہ اہم اعلان خود کرنے کے بجائے بلاول بھٹو زرداری سے کرانے کا مقصد بظاہر امین فہیم کے وزیر اعظم کے لیے نامزد نہ ہونے کے صورت میں پارٹی کے اندر ممکنہ اختلافات کو روکنا ہے۔

بلاول اور صنم بھٹو کی گڑھی خدا بخش روانگی
سکھر سے ہمارے نامہ نگار نثار کھوکھر نے بتایا ہے کہ پاکستان پیپلز پارٹی کے چیئرمین بلاول بھٹو زرداری کراچی سے سکھر پہنچے تو ان کا سکھر ائرپورٹ پر پہچنے پر والہانہ استقبال کیا گیا۔ ان کے ساتھ بینظیر بھٹو کی بہن صنم بھٹو بھی تھیں۔ آصف علی زرداری کے قریبی دوست اور سکیورٹی کے انچارج ڈاکٹر ذوالفقار مرزا اور آغا سراج درانی بھی ان کے ہمراہ تھے۔

بلاول اور صنم بھٹو بلٹ پروف گاڑیوں کے قافلے میں روانہ ہو گئے۔

سکھر ائرپورٹ پر پولیس کے ساتھ ساتھ آصف علی زرداری کے ذاتی محافظوں کی بڑی تعداد موجود تھی۔

تاہم پیپلز پارٹی کے کسی بھی مرکزی رہنما نے اس بات کی تصدیق نہیں کی ہے کہ بلاول رات نوڈیرو میں گزاریں گے یا اسلام آباد روانہ ہو جائیں گے۔