ریاض سہیل بی بی سی اردو ڈاٹ کام، کراچی

	کراچی میں مرحومہ بینظیر بھٹو کے استقبال کے لیے لاکھوں افراد جمع ہوئے تھے

عدالت نے یہ حکم پاکستان پیپلز پارٹی سندھ کے صدر سید قائم علی شاہ کی درخواست پر جاری کیا ہے۔ انہوں نے اٹھارہ اکتوبر کو بینظیر بھٹو کے جلوس میں ہونے والے بم حملے کے تحقیقاتی ٹرئبیونل کی تشکیل کو ہائی کورٹ میں چیلنج کر رکھا ہے۔

کراچی میں اٹھارہ اکتوبر کو مرحومہ بینظیر بھٹو کے استقبالیہ جلوس میں ہونے والے بم دھماکوں میں کم سے کم ایک سو چالیس افراد ہلاک اور پانچ سو کے قریب زخمی ہوگئے تھے۔ یہ ٹرئبیونل حفاظتی انتظامات کا جائزہ لینے اور اس کی ذمہ داری کا تعین کرنے کے لیے بنایا گیا ہے۔

سندھ ہائی کورٹ کے جسٹس محمود عالم رضوی اور جسٹس مسز قیصر اقبال پر مشتمل ڈویژن بینچ کے روبرو منگل کو اس درخواست کی سماعت ہوئی، جس میں سید قائم علی شاہ کے وکیل فاروق نائیک نے دلائل دیئے عدالت نے حکم امتناعی جاری کرتے ہوئے سماعت 15 اپریل تک ملتوی کردی۔

سید قائم علی شاہ کی جانب سے دائر کی گئی پٹیشن میں کہا گیا ہے کہ اس ٹرئبیونل کی تشکیل غیرقانونی ہے اور اس کے پاس کوئی اختیار حاصل نہیں ہے۔

پاکستان پیپلز پارٹی کے وکیل فاروق ایچ نائیک کا کہنا ہے کہ اس ٹرئبیونل کا مقصد اصل مجرمان کو تحفظ فراہم کرنا ہے کیونکہ اٹھارہ اکتوبر کے حوالے سے بینظیر بھٹو کی ایف آئی آر بھی رجسٹر نہیں کی گئی ہے اور جب سیشن جج سے اس کی اجازت لی گئی تو ہائی کورٹ سے اسے منسوخ کروایا گیا۔

	اس حملہ میں ایک سو چالیس افراد ہلاک ہو گئے تھے

سپریم کورٹ کے معزول چیف جسٹس افتخار محمد چودھری کی جانب سے واقعہ کا از خود نوٹس لینے کے بعد سندھ حکومت نے ریٹائرڈ جج ڈاکٹر غوث محمد کی سربراہی میں ٹرئبیونل تشکیل دیا تھا۔

ا سے قبل ٹرئبیونل نے بینظیر بھٹو کی آمد کے موقعے پر سیکیورٹی انچارج ڈاکٹر ذوالفقار مرزا، پیپلز پارٹی سندھ کے صدر سید قائم علی شاہ اور بینظیر بھٹو کا ٹرک چلانے والے ڈرائیور عبدالغنی کو متعدد بار نوٹس جاری کرچکا ہے مگر کسی نے بھی اپنا بیان قلمبند نہیں کروایا ہے۔

تاہم صرف پولیس اہلکاروں اور بم ڈسپوزل اسکواڈ کے عملے نے اپنے بیانات ریکارڈ کروائے ہیں ۔