نثار کھوکھر بی بی سی اردو ڈاٹ کام، سکھر

	رہائی کے بعد سے اعتزاز احسن کی آصف زرداری سے ملاقات نہیں ہوئی

چودھری اعتزاز احسن سکھر ہائی کورٹ بار ایسوسی ایشن کے رہنماء امداد اعوان کی رہائش گاہ پر میڈیا سےگفتگو کر رہے تھے۔

انہوں نے مثال دیتے ہوئے کہا کہ اگر کربلا میں اکہتر لوگوں کو کہا جاتا کہ وہ چلے جائیں صرف امام حسین کو شہید کیا جائے گا تو کیا وہ لوگ جا سکتے تھے؟ چونکہ مسئلہ امام حسین کی بعیت کا تھا وہ نہیں جا سکتے تھے۔

اعتزاز احسن کا کہنا تھا کہ ’اسی طرح موجودہ مسئلہ ہمارے افتخار محمد چودھری کا ہے۔ یہ مسئلہ چودہری کی بعیت کا ہے‘۔ انہوں نےکہا کہ ’اگر میں مان جاؤں کہ افتخار محمد چودھری کےعلاوہ بیالیس جج آپ رکھ لیں تو میں شریف الدین پیرزادہ بن جاؤں گا میری کوئی عزت نہیں رہے گی۔‘

چودھری اعتزاز احسن منگل کی صبح سکھر سےگڑھی خدابخش بھٹو پہنچے جہاں انہوں نے بینظیر بھٹو کی قبر پرحاضری دی اور پھول نچھاور کیے۔اس موقع پر انہوں نے کہا کہ ان کے سر سے بوجھ ہلکا ہوگیا ہے۔

گڑھی خدا بخش بھٹو سے واپسی پر چودھری اعتزاز احسن نے پیپلزپارٹی سکھر کےمقامی رہنماؤں کی طرف سےدیئے گئے ظہرانے میں شرکت کی۔

چودھری اعتزاز احسن نےکہا کہ عدلیہ کی بحالی کی تحریک میں ان کا کوئی ذاتی مفاد نہیں وہ ملک و قوم کی مفاد کی خاطر وکلا تحریک چلا رہے ہیں۔انہوں نےکہا کہ ججوں کی نظربندی اور معزولی ایک بھیانک جرم ہے۔

انہوں نےکہا ججوں کے بچوں کو حراست میں رکھنے کی مثال دنیا میں کہیں نہیں ملتی۔ اعتزاز احسن نے کہا کہ صرف ایک شخص یعنی صدر مشرف کی ذاتی انا کی خاطر ججوں کو قید میں رکھا گیا ہے۔

دوسری جانب ایک مقامی ٹی وی چینل سے بات چیت کرتے ہوئے چودھری اعتزاز احسن نے کہا کہ اگر پیپلزپارٹی اپنی انتخابی مہم کے دوران عدلیہ کی بحالی کے لیے کو زور شور سے اور نمایاں انداز میں بات کرتی تو پنجاب اور ملک بھر سے ان کی جماعت کو پچاس کےقریب زیادہ نشستیں حاصل ہوجاتیں۔

انہوں نے ایک سوال کےجواب میں کہا کہ وہ فی الوقت وکلا تحریک میں مصروف ہیں اور پیپلز پارٹی کےشریک چیئرمین آصف زرداری سے ان کا رابطہ نہیں ہوا۔

چودھری اعتزاز احسن منگل کی شام کو سکھر سےکراچی کےلیے روانہ ہوگئے ہیں جہاں وہ بدھ کے روز کراچی بار کےاجتماع سے خطاب کریں گے۔