عزیزاللہ خان بی بی سی اردو ڈاٹ کام کوئٹہ

	اس دھماکے کی ذمہ داری بلوچ لبریشن آرمی نے قبول کر لیا ہے

یہ واقعہ پیرکوہ اور پیر سوری کے درمیان کچی سڑک پر پیش آیا ہے جب فرنٹیر کور کے اہلکار مورچوں پر تعینات اہلکاروں کے لیے کھانا لے کرجا رہے تھے۔

پولیس کے مطابق ایف سی اس دھماکے میں چھیاسی ونگ کے دو نائک اور دو سپاہی ہلاک جبکہ ایک اہلکار زخمی ہوا ہے۔

دریں اثناء اپنے آپ کو کالعدم تنظیم بلوچ ریپبلکن آرمی کا ترجمان ظاہر کرنے والے سرباز بلوچ نے ٹیلیفون پر حملے کی ذمہ داری قبول کی ہے اور کہا ہے کہ ریموٹ کنٹرول دھماکے کے بعد انہوں نے خوکار ہتھیاروں سے حملہ بھی کیا جس میں فورسز کا نقصان زیادہ ہوا ہے۔

سرباز بلوچ نے کہا ہے کہ گزشتہ رات اوچ کے قریب آر ڈی دو سو بیالیس کے مقام پر انہوں نے تعمیراتی کمپنی کے عملے پر بھی حملہ کیا ہے۔ پولیس کے مطابق اس حملے میں دو مزدور زخمی ہوئے ہیں جنہیں ڈیرہ اللہ یار ہسپتال لایا گیا ہے۔

کل رات کوئٹہ سبی تربت حب اور ڈیرہ اللہ یار میں کوئی ایک درجن کے قریب دھماکے ہوئے تھے لیکن کوئی نقصان نہیں ہوا تھا۔

بلوچستان کے نگراں وزیر اعلی سردار صالح بھوتانی نے گزشتہ روز بی بی سی کو بتایا تھا کہ ڈیرہ بگٹی اور کوہلو میں سیکیورٹی فورسز کی کارروائی ان لوگوں کے خلاف ہوتی ہے جو قومی تنصیبات پر حملے کرتے ہیں۔

یاد رہے کچھ روز پہلے تک کوہلو اور ڈیرہ بگٹی سے یہ اطلاعات موصول ہو رہی تھیں کہ سیکیورٹی فورسز نے ان دونوں اضلاع کے سرحدی علاقوں میں سرچ آپریشن شروع کر رکھا ہے جس میں بڑی تعداد میں گرفتاریاں کی گئی ہیں اور فضا میں ہیلی کاپٹر بھی گشت کرتے رہتے تھے۔