احمد رضا بی بی سی اردو ڈاٹ کام، کراچی

	شاہ فیصل ٹاؤن میں واقع کے بعد علاقے میں کشیدگی پھیل گئی۔

زخمیوں کو جناح اسپتال میں داخل کیا گیا ہے۔

یہ واقعہ بدھ اور جمعرات کی درمیانی شب شاہ فیصل ٹاؤن میں پیش آیا جس کے بعد علاقے میں کشیدگی پھیل گئی۔

علاقے کے ٹاؤن پولیس آفیسر جاوید علی کا کہنا ہے کہ ’علاقے میں دونوں جماعتوں کے اجتماعات تھے جس کے دوران فائر ہوا جس سے اشتعال پھیلا ۔ چونکہ دونوں جگہوں پر لوگ موجود تھے تو اس کے باعث بات بڑھ گئی۔‘

واقعے کے بعد متحدہ قومی موومنٹ کے قومی اسمبلی کے حلقہ دو سو چھپن سے امیدوار اقبال محمد علی خان نے شاہراہ فیصل تھانے پر پیپلز پارٹی کے قومی اسمبلی کے حلقہ دو سو تریپن سے امیدوار سید فیصل رضا عابدی کے خلاف اقدام قتل کا مقدمہ درج کرایا ہے۔

اس مقدمے میں پیپلز پارٹی کے کارکنوں سید اسرار شاہ، افتخار شاہ، مولائی عرف گڈو، حسرت اور رضوان کے خلاف بھی اقدام قتل کا مقدمہ درج کرایا ہے۔ اس مقدمے میں انہوں نے الزام لگایا ہے کہ انہوں نے ایم کیو ایم کی کارنر میٹنگ پر فائرنگ کی جس کے نتیجے میں پارٹی کا ایک کارکن محمد دین شدید زخمی ہوگیا۔

ایف آئی آر کے مطابق ایم کیو ایم کے کارکنوں نے مقدمے میں نامزد ملزم رضوان کو پولیس کے حوالے بھی کیا ہے تاہم پیپلز پارٹی کراچی ڈویژن کے صدر راشد ربانی نے ایم کیو ایم کے اس الزام کی تردید کی ہے۔

’رضوان کو ایم کیو ایم کے کارکنوں نے تشدد کا نشانہ بنا کر سخت زخمی کردیا تھا جس کے بعد پولیس نے اس کو اپنی گاڑی میں ڈال کر جناح اسپتال پہنچایا جہاں وہ زیر علاج ہے۔‘

انہوں نے کہا کہ ان کی جماعت کے قومی اسمبلی کے امیدوار مرزا مقبول اور صوبائی اسمبلی کے امیدوار عامر شاہ کی انتخابی مہم کے سلسلے میں شاہ فیصل ٹاؤن میں کارنر میٹنگ ہورہی تھی جس پر حملہ ہوا۔

کراچی میں پیپلز پارٹی کے کارکنوں کو شدید دباؤ کا سامنا ہے اسکے باوجود کارکن صبروتحمل کے ساتھ پارٹی کی انتخابی مہم چلارہے ہیں۔ پاکستان پیپلز پارٹی

راشد ربانی کے مطابق مسلح حملہ آوروں نے فائرنگ کے بعد پی پی کارنر میٹنگ کے لئے لگائے گئے شامیانے اور سٹیج کے علاوہ وہاں کھڑی موٹر سائیکلوں کو بھی آگ لگا دی۔

انہوں نے کہا کہ پولیس مسلسل ان کی جانب سے مقدمہ درج کرنے سے انکار کر رہی ہے۔

’ہم پر امن لوگ ہیں اور انتخابات کو پرامن طور پر پایۂ تکمیل تک پہنچانا چاہتے ہیں تاکہ پاکستان میں جمہوریت بحال ہو۔‘

ان کا کہنا تھا کہ کراچی میں پیپلز پارٹی کے کارکنوں کو شدید دباؤ کا سامنا ہے اسکے باوجود کارکن صبروتحمل کے ساتھ پارٹی کی انتخابی مہم چلارہے ہیں۔

واضح رہے کہ کراچی میں حالیہ انتخابی مہم کے دوران حریف سیاسی جماعتوں کے کارکنوں کے درمیان مسلح تصادم کا یہ پہلا واقعہ ہے۔

اس سے پہلے چھ فروری کو سہراب گوٹھ کے علاقے میں عوامی نیشنل پارٹی کے صوبائی نائب صدر فضل الرحمن آکا خیل کو نامعلوم افراد نے گولیاں مارکر قتل کردیا تھا جس کے بعد شہر کے مختلف حصوں میں حالات دو دن تک کشیدہ رہے تھے۔