احمد نور بی بی سی اُردو ڈاٹ کام، لاہور

	اسلام آباد میں یوم کشمیر ڈے پر پولیس کی بکتر بند گاڑی پر مشتعل ہجوم نے پتھراؤ کیا

لاہور میں یوم کشمیر کے حوالے سے ہونے والی تقریب میں پاکستان مسلم لیگ نواز کے صدر شہباز شریف نے اپنی رہائش گاہ پر کشمیریوں کے کنونشن سے خطاب کرتے ہوئے کہا کہ کشمیر کے مسئلے کا حل اُن کے منشور کا حصہ ہے جبکہ مشرف حکومت بیرونی طاقتوں کے ایماء پر مسئلہ کشمیر کو التوا میں ڈال رہی ہے۔

مال روڈ پر جگہ جگہ رنگ برنگے پرچم لگائےگئے اور جہادی ترانے بجائے گئے ریگل چوک پر جماعت الدعوۃ نے یکجہتی کشمیر کانفرنس کا انعقاد کیا جس میں حریت کانفرنس اور متحدہ جہاد کونسل نے بھی شرکت کی۔

کشمیری رہنما سید علی گیلانی نے ٹیلیفونک خطاب کرتے ہوئے کہا کہ اسلامی ممالک کی تنظیم او آئی سی اور اقوام متحدہ نے کشمیر کے مسئلے کو حل کروانے میں کوئی اہم کردار ادا نہیں کیا جبکہ پاکستانی حکمران بھی اپنے اقتدار کو بچانے کے لیے مغربی طاقتوں کے ہاتھوں استعمال ہو رہے ہیں۔

جماعت اسلامی کے زیرِاہتمام بھی ایک اجلاس ہوا جس میں امیر لیاقت بلوچ کا کہنا تھا کہ مشرف حکومت کی غیرمناسب پالیسیوں کی وجہ سے کشمیر کی آزادی کی جنگ کو نقصان پہنچا ہے۔

کراچی میں یوم یکجہتی کشمیر کے موقع پر منگل کو کراچی پریس کلب کے باہر جہاں مختلف مذہبی سیاسی تنظیموں نے احتجاجی مظاہرے کئے۔