ریاض سہیل بی بی سی اردو ڈاٹ کام ،کراچی

	ملزمان نے جج کو بتایا کہ پولیس نے انہیں تشدد کا نشانہ بنایا ہے۔

تفتیشی پولیس نے عدالت سے گذارش کی کہ ملزمان سے منصوبہ بندی اور ساتھیوں کے بارے میں تفتیش کرنی ہے اور مزید اسلحہ برآمد کرنا ہے۔ عدالت نے ملزمان کو سات فروری تک پولیس کے حوالے کر دیا۔

جسٹس خواجہ نوید احمد کےمعلوم کرنے پر ملزمان نے بتایا کہ پولیس نے انہیں تشدد کا نشانہ بنایا ہے۔جج نے پولیس کو ایسا نہ کرنے کے لیے کہا۔

اس سے قبل ملزمان کے سر چادروں سے ڈھانپ کر سخت حفاظتی انتظامات میں عدالت میں پیش کیا گیا۔ملزم عابد کا کہنا تھا کہ ان پر الزام بے بنیاد ہیں اور انہیں دو روز قبل ایک بس سے گرفتار کیا گیا ہے۔

لانڈھی میں دو روز قبل پولیس مقابلے میں ہلاک ہونے والے ملزمان جنید، عبداللہ اور نامعلوم شخص کی لاش لینے کے لیے لواحقین نے رابطہ نہیں کیا ہے۔ یہ لاشیں ایدھی سرد خانے میں موجود ہیں۔

ادھر بی بی سی کو نامعلوم مقام سے ایک شخص نے ٹیلیفون پر بتایا ہے کہ کراچی پولیس کا دعویٰ غلط ہے کہ لانڈھی میں مقابلے میں عبداللہ نامی شخص ہلاک ہوگیا ہے۔ یہ شخص خود کو عبداللہ بتا رہا تھا اور اس کا کہنا تھا کہ کراچی پولیس نے اس کے ساتھیوں کوگرفتار کیا ہے۔

یاد رہے کہ منگل کو چار گھنٹے جاری رہنے والے پولیس مقابلے میں دو پولیس اہلکاروں سمیت پانچ افراد ہلاک ہوگئے تھے جس کے بعد کراچی پولیس کا کہنا تھا کہ اس واقعے میں کور کمانڈر حملہ کیس کے مفرور ملزم قاسم طوری اور طیب داد سمیت چار مشتبہ ملزمان اور چار خواتین کو حراست میں لیا گیا ہے اور جائے وقوعہ سے بھاری اسلحہ اور دھماکہ خیز مواد بھی برآمد کیا گیا ہے۔