دلاور خان وزیر بی بی سی اردو ڈاٹ کام ڈیرہ اسماعیل خان

	جنوبی وزیرستان میں شدت پسندوں کی کارروائیوں میں شدت آئی ہے

عام لوگوں کا کہنا ہے کہ گرفتار کیئے جانے والوں میں کوئی بھی مشکوک نہیں اور تمام کے تمام عام شہری ہیں اور لدھا کے مقام پر جیٹ طیاروں سے بمباری کی بھی اطلاع ہے لیکن اس میں کسی جانی نقصان ہونے کی اطلاع نہیں ملی ہے۔

جنوبی وزیرستان کے مقامی پولیٹکل انتظامیہ کا کہنا ہے کہ سنیچر کو تین بجے کے قریب جنوبی وزیرستان کے علاقہ چگملائی میں سکیورٹی فورسز نے ایک کارروائی کے دوران تیس مشکوک افراد کو گرفتار کرلیا ہے۔ جن کا تعلق محسود قبائل سے بتایا جاتا ہے۔ حکام کے مطابق گرفتار ہونے والوں میں بعض عام شہری بھی شامل ہیں۔ جن کو تفتیش کے بعد رہا کردیا جائے گا۔

جنوبی وزیرستان سے سابق ممبر قومی اسمعبلی مولانا معراج الدین نے بی بی سی کو بتایا کہ سکیورٹی فورسز کی کارروائی میں عام لوگوں کو نشانہ بنایا جا رہا ہے۔ انہوں نے کہا کہ سکیورٹی فورسز کی مختلف کارروائیوں میں گرفتار ہونے تمام افراد عام شہری ہیں۔

دوسری جانب جنوبی وزیرستان کے سب ڈویژن لدھا سے سرکاری اطلاع کے مطابق لدھا کے علاقے میں دو مشکوک ٹھکانوں پر جیٹ طیاروں نے بمباری کی ہے۔ طیارے بمباری کے بعد واپس لوٹ گئے ہیں۔ لیکن اس بمباری میں کسی جانی نقصان کی اطلاع نہیں ملی ہے۔

یاد رہے کہ جنوبی وزیرستان میں اس وقت حالات انتہائی کشیدہ ہے محسود کے علاقے سے ملنے والے تمام راستے بند ہیں۔ بجلی معطل ٹیلی فون بند اور عام شہری علاقے سے نقل مکانی پر مجبور ہوگئے ہیں۔ توپخانے کی گولہ باری دن رات جاری ہے۔