رفعت اللہ اورکزئی
بی بی سی اردو ڈاٹ کام پشاور |  |
| | | طالبان کی کارروائیوں میں تیزی آ رہی ہے |
پاکستان میں مقامی طالبان کی تنظیم نے قبائلی علاقے جنوبی وزیرستان میں ایک اور سکاوٹس قلعہ پر قبضے کا دعویٰ کیا ہے۔ تاہم پاکستان فوج نے عسکریت پسندوں کے اس دعوے کی سختی سے تردید کی ہے۔ تحریک طالبان پاکستان کے ترجمان مولوی عمر نے جمعرات کو کسی نامعلوم مقام سے بی بی سی کو ٹیلی فون کرکے بتایا کہ بدھ اور جمعرات کی درمیانی رات تقریباً سو کے قریب مسلح مقامی عسکریت پسندوں نے جنڈولہ کے قریب واقع سکاوٹس کے ایک قلعے سپلاتوئی پر حملہ کیا۔ ترجمان نے دعویٰ کیا کہ وہاں موجود سکیورٹی اہلکاروں نے شدت پسندوں کے حملے سے قبل ہی ہتھیار ڈال دیئے تھے اس لئے بیت اللہ محسود کے کہنے کے مطابق سکاواٹس اہلکاروں کو معاف کر کے بعد میں انہیں آزاد کردیا گیا۔ انہوں نے کہا کہ قلعے پر حملے کے وقت وہاں ساٹھ کے قریب سکیورٹی اہلکار موجود تھے۔ مولوی عمر کے مطابق عسکریت پسندوں نے عمارت میں موجود تمام اسلحہ اور گولہ بارود بھی قبضے میں لے لیا ہے۔ مقامی ذرائع کا کہنا ہے کہ سپلاتوئی قلعے میں موجود سکیورٹی اہلکار شدت پسندوں کے حملے سے پہلے ہی علاقہ چھوڑ کر جاچکے تھے۔ اس سلسلے میں پاکستان فوج کے ترجمان میجر جنرل اطہر عباس سے رابط کیا گیا تو انہوں نے قلعے پر طالبان قبضے کی سختی سے تردید کی۔ واضح رہے کہ مقامی طالبان نے گزشتہ روز بھی جنوبی وزیرستان ہی میں سکاواٹس کے ایک قلعے سراروغہ پر قبضہ کیا تھا۔ طالبان کا دعوی ہے کہ دونوں قلعوں پر ان کا قبضہ بدستور برقرار ہے۔ | 
باجوڑ: قبائل اور حکومت میں معاہدہ
