عزیزاللہ خان بی بی سی اردو ڈاٹ کام کوئٹہ

	شدید بارشوں سے کچے مکانات بھی متاثر ہوئے ہیں۔

کوئٹہ میں مکان کی چھت گرنے سے ایک خاتون ہلاک ہو گئی ہے جبکہ تربت سے مقامی لوگوں نے بتایا ہے کہ سیلاب سے متاثرہ افراد کے لیے قائم کی گئی خیمہ بستوں میں پانی جمع ہو گیا ہے اور ندی نالے پانی سے بھر گئے ہیں۔

خیموں میں رہائش پذیر متاثرین کو پہلے ہی اس بات کی شکایت تھی کہ انہیں بنیادی ضروریات کی اشیاء بھی دستیاب نہیں ہیں اور خدشہ ہے کہ صورتحال بارشوں سے مزید بگڑ سکتی ہے۔

نوکنڈی سے مقامی صحافی سعید نے بتایا ہے کہ شدید بارشوں سے کچے مکانات کو نقصان پہنچا ہے جس وجہ سے بڑی تعداد میں لوگ قریب کی مسجدوں اور پکی عمارتوں میں پناہ لے رہے ہیں۔

ایران کی سرحد کے قریب واقع شہر ماشکیل سے زمینی رابطہ منقطع ہو گیا ہے جبکہ سیندک میں ڈیڑھ فٹ تک اور تفتان میں ہلکی برفباری ہوئی ہے۔

بارشوں کا سلسلہ صوبے کے تقریبا تمام علاقوں میں جاری ہے جس سے سردی کی شدت میں بھی اضافہ ہوگیا ہے۔

چمن سے آمدہ اطلاعات کے مطابق تین روز سے جاری بارشوں سے راستے بند ہو گئے ہیں اور مواصلات کا نظام بری طرح متاثر ہوا ہے۔

کوئٹہ میں بارشوں سے نشیبی علاقوں میں پانی جمع ہو گیا ہے اور نکاسی آب کی نالیوں کی صفائی نہ ہونے کی وجہ سے سڑکوں اور گلیوں میں گندا پانی بہہ رہا ہے۔

محکمہ موسمیات کے مطابق دالبندین میں پچیس اور قلات میں چوبیس ملی میٹر بارش ریکارڈ کی گئی ہے۔