عزیزاللہ خان بی بی سی اردو ڈاٹ کام،کوئٹہ

سوئی سدرن گیس کمپنی کے جنرل مینجر مشتاق صدیقی نے بتایا ہے کہ آٹھ انچ قطر کی پائپ لائن دھماکہ خیز مواد سے آڑایا گیا ہے ۔ انہوں نے کہا کہ اس پائپ لائن سے مستونگ اور قلات کو گیس فراہم کی جاتی ہے۔

دریں اثناء اپنے آپ کو کالعدم تنظیم بلوچ لبریشن آرمی کا ترجمان ظاہر کرنے والے بیبرگ بلوچ نامی شخص نے ٹیلیفون پر گیس پائپ لائن پر حملے کی ذمہ داری اپنی تنظیم کی جانب سے قبول کی ہے۔

بیبرگ بلوچ نے دو روز پہلے کوئٹہ کے مضافات میں حجام کی دکان پر حملے کی ذمہ داری قبول کرتے ہوئے کہا ہے کہ انہوں نے خفیہ ایجنسیوں کے اہلکاروں کو نشانہ بنایا تھا۔

اس کے علاوہ آج کوئٹہ شہر میں شدید سردی کے دوران گیس پائپ لائن پر مرمت کا کام شروع کیا گیا ہے جس وجہ سے شہر کو گیس کی ترسیل بند کی گئی ہے۔

اس سردی میں جہاں سردی کی شدت میں اتنا اضافہ ہوگیا ہے کہ درجہ حرارت منفی دس ڈگری سینٹی گریڈ تک گر گیا ہے وہاں گیس کی عدم دستیابی کی وجہ سے لوگوں کو مشکلات کا سامنا ہے۔

ان دنوں کوئٹہ سمیت بلوچستان کے دیگر علاقے جیسے قلات مستونگ زیارت وغیرہ میں گیس کا دباؤ انتہائی کم ہوگیا ہے۔گیس کمپنی کے جنرل مینجر مشتاق صدیقی نے اس بارے میں بتایا ہے کہ مرمت کا کام جاری ہے جس کے بعد تمام علاقوں کو گیس کا دباؤ بڑھ جائے گا اور لوگوں کو شکایت نہیں رہے گی۔

گیس کی ترسیل میں کمی بیشی اور لوگوں کی غفلت کی وجہ سے اکثر کوئٹہ اور دیگر علاقوں میں اموات ہو جاتی ہیں۔