عبدالحئی کاکڑ بی بی سی اردو ڈاٹ کام، پشاور

	کوئٹہ میں بھی صارفین کو آٹے کی قلت کا سامنا ہے

پشاور میں سنچیر کو پریس کانفرنس سے خطاب کرتے ہوئے صوبائی سیکریٹری خوراک ڈاکٹر حفظ الرحمن نےکہا کہ فلور مل مالکان کوٹے کے مطابق مارکیٹ کو آٹا فراہم نہیں کررہے ہیں۔

انہوں نے مزید کہا کہ صوبہ سرحد کے تقریباً سوفلور ملوں کو روزانہ مجموعی طور پر تین ہزار ٹن گندم رعایتی قیمتوں پر فراہم کیا جارہا ہے تاہم انکے بقول مل مالکان ضرورت کے مطابق آٹا مارکیٹ کو فراہم نہیں کررہا ہے۔

انکے مطابق صوبے کو روزانہ چھ ہزار ٹن گندم کی ضرورت ہوتی ہے۔ تین ہزار ٹن تاجر پنجاب سے براہ راست برآمد کرتے ہیں۔انکے بقول حکومت کے پاس اب بھی پینتیس ہزار ٹن گندم کا ذخیرہ موجود ہے۔

سکیریٹری خوراک نے کہا کہ

حکومت ایک ہفتے تک صورتحال کو مانیٹر کرے گی اور اگر پھر بھی آٹا ملوں نے مارکیٹ کو ضرورت کے مطابق آٹا سپلائی نہیں کیا تو انکا لائسنس منسوخ یا کوٹہ معطل کیا جاسکتا ہے سیکریڑری خوراک، صوبہ سرحد

انہوں نے مزید کہا کہ فلور ملوں کو ہدایت کی گئی ہے کہ وہ عام صارف کو بیس کلو آٹے کی بوری تین سو دس روپے میں فراہم کریں مگر بقول انکے اس وقت پانچ سو روپے میں بیس کلو آٹے کی بوری دستیاب ہے۔

ڈاکٹر حفظ الرحمن نے پریس کانفرنس کے دوران کہا کہ وفاقی حکومت آئندہ ماہ تک صوبہ سرحد کو ڈھائی لاکھ ٹن گندم فراہم کردے گی۔

واضح رہے کہ پاکستان کے بعض دیگر علاقوں کی طرح صوبہ سرحد میں بھی گزشتہ ایک ہفتے کے دوران آٹے کی قلت پیدا ہوئی ہے اور قیمتوں میں بے تحاشا اضافہ ہوا ہے جسکے خلاف مختلف علاقوں میں شہریوں کا احتجاج جاری ہے۔