ریاض سہیل
بی بی سی اردو ڈاٹ کام، کراچی |  |
| | | سانحہِ کارساز میں ڈیڑہ سو سے زائد افراد ہلاک ہوگئے تھے |
کراچی میں پاکستان پیپلز پارٹی کی چیئرپرسن بینظیر بھٹو کے قافلے پر بم حملے کی تحقیقات کرنے والے ٹربیونل میں دو پولیس افسران نے انکشاف کیا ہے کہ وہ بینظیر بھٹو کی فلوٹ سے آگے تھے اور ان کی نظر ان پر نہیں تھی۔ یہ ٹربیونل اٹھارہ اکتوبر کو کراچی میں بینظیر بھٹو کے جلوس پر حملے میں ملوث ملزمان اور انتظامی خامیوں کا تعین کرنے کے لیے بنایا گیا ہے، جس کے سربراہ جسٹس غوث محمد ہیں۔ ٹربیونل میں جمعرات کو ایس پی جاوید بلوچ اور انسپیکٹر تصدق وارث نے بیانات رکارڈ کروائے اور ان سے جرح کی گئی۔ ایس پی جاوید بلوچ کا کہنا تھا کہ وہ جلوس کے ساتھ ساتھ تھے اور وہ پاکستان پیپلز پارٹی کی سیکیورٹی منتظمین سے رابطے میں تھے۔ اس وقت پاکستان پیپلز پارٹی کے ورکرز بھی بینظیر بھٹو کے ساتھ ساتھ چل رہے تھے۔ جسٹس غوث محمد نے ان سے پوچھا کہ کیا ان ورکروں کو چیک کیا گیا تھا، ان میں سے کسی کے پاس اسلحہ تو نہیں تھا؟ ایس پی جاوید بلوچ نے اس کا جواب نفی میں دیا۔ جسٹس غوث محمد نے معلوم کیا کہ دھماکے سے پہلے یا بعد میں کیا بینظیر بھٹو ٹرک پر موجود تھیں؟ ایس پی جاوید بلوچ کا کہنا تھا کہ وہ کافی آگے تھے یہ دیکھ نہیں سکےتھے۔ ان کے اس بیان پر جسٹس غوث محمد نے سر پر ہاتھ رکھتے ہوئے کہا کہ جس شخص کی سیکیورٹی کی ذمہ داری آپ کو دی گئی تھی آپ نے اس پر نظر ہی نہیں رکھی ہوئی تھی۔ ٹربیونل نے اپنی کارروائی پیر تک ملتوی کردی۔ ٹربیونل میں گزشتہ روز سب انسپکٹر عابد حسین نے بیان دیا تھا کہ وہ گاڑی سے تین سو فٹ دور تھے کہ پہلے دھماکہ ہوا، رش کی وجہ سے آگے نہیں بڑہ سکے تھے ۔ ان کا کہنا تھا کہ دھماکے والی جگہ کے قریب چار مشتبہ افراد موجود تھے جو گلیوں میں غائب ہوگئے اور وہ ان کا پیچھا نہیں کرسکے۔ پیپلز پارٹی کی چیئرپرسن بینظیر بھٹو آٹھ سالہ خود ساخہ جلاوطنی کے بعد اٹھارہ اکتوبر کو کراچی پہنچی تھیں تو ان کے استقبالی جلوس پر بم حملا کیا گیا تھا، جس میں ڈیڑہ سو سے زائد افراد ہلاک ہوگئے تھے۔ | 
باجوڑ: قبائل اور حکومت میں معاہدہ
