عبادالحق بی بی سی اردو ڈاٹ کام، لاہور

	لاہور میں بھی کچھ مقامات پر پُر تشدد مظاہرے ہوئے

جمعرات کے شب جاری ہونے والےایک سرکاری ہینڈ آؤٹ کے مطابق نگران وزیر اعلیٰ نے دہشت گردی کے نتیجہ میں بینظیر بھٹو کی ہلاکت کی ہائی کورٹ کے جج کے ذریعے عدالتی تحقیقاتی کا حکم دیا ہے۔ جبکہ ایڈیشنل انسپکٹر جنرل آف پولیس کی سربراہی میں ایک اعلیٰ اختیاراتی تحقیقات ٹیم تشکیل دی گئی ہے۔ یہ تحقیقاتی ٹیم سات دنوں میں اپنی رپورٹ پیش کرے گی۔

دوسری جانب حکومت پنجاب نے بینظیر بھٹو کی ہلاکت پر تین کے سوگ کا اعلان کیا ہے۔ جمعرات کی شب جاری ہونے والےایک سرکاری ہینڈ آؤٹ میں کہا گیا کہ پنجاب بھر کے تمام سرکاری دفاتر، سکول اور کالج تین دن بند رہیں گے۔

جسٹس (ر) اعجاز نثار نے بینظیربھٹو کی موت پر سوگوار خاندان سے دلی ہمدردی کا بھی اظہار کیاہے۔

علاوہ ازیں بینظیر بھٹو کے ہلاکت پر لاہور ہائی کورٹ بار ایسوسی ایشن کے صدر احسن بھون نے پندرہ روز کے سوگ کا اعلان کیا ہے ۔ بار کے صدر احسن بھون نے بینظیر بھٹو کی ہلاکت کو ایک قومی سانحہ قرار دیا اور کہا کہ ہائی کورٹ بار کے ارکان پندرہ دنوں تک عدالتوں کا مکمل بائیکاٹ کریں گے۔

لاہور بار ایسوسی ایشن نے پانچ روز کےسوگ کا اعلان کیا ہے۔ لاہور بار ایسوسی ایشن کے سیکرٹری شمیم الرحمن ملک نے اس واقعہ کی شدید مذمت کرتے ہوئے کہاہے کہ اس سانحہ پر ضلعی بار ایسوسی ایشن کے ارکان بینظیر بھٹو کی ہلاکت پر پانچ دنوں کا عدالتی بائیکاٹ کریں گے۔